YUNANISTANIN AZƏRBAYCANDAKI SƏFİRLİYİ ŞƏKİ VƏRƏM DİSPANSERİNƏ RENTGEN APARATI HƏDİYYƏ ETMİŞDİR
AZƏRTAC xəbər verir ki, Yunanıstanın Azərbaycandakı səfirliyinin köməyi ilə Şəki Rayonlararası Vərəm Dispanserində yeni, müasir rentgen aparatı quraşdırılmışdır.
Bu münasibətlə iyunun 27-də dispanserdə şəhər rəhbərliyi və Yunanıstan səfiri Temistokles Dimidisin iştirakı ilə yeni aparatın təqdimat mərasimi olmuşdur. Tədbirdə çıxış edən səfir bu layihənin yunan xalqı adından dost Azərbaycanda səhiyyənin inkişafı ilə bağlı həyata keçirilən çoxsaylı tədbirlərdən biri olduğunu bildirmiş, Şəki ilə dostluq əlaqələrinin genişləndirilməsindən məmnun qaldığını, sosial sahələrin inkişafı ilə bağlı belə layihələrin gələcəkdə də davam etdiriləcəyini diqqətə çatdırmışdır.
Şəhər icra hakimiyyətinin başçısı Nazim İbrahimov göstərilən yardıma görə dost ölkənin elçisinə rayon sakinləri adından minnətdarlıq etmiş, dispanserdə quraşdırılan Koreya istehsalı olan yeni rentgen aparatının əhaliyə göstərilən tibbi xidmətin keyfiyyətinin və vərəm xəstəliklərinin diaqnostikasının daha da yaxşılaşdırılmasına müsbət təsir göstərəcəyinə əminliyini bildirmişdir.
Sonra şəhər rəhbərliyi və səfir Temistokles Dimidis yeni aparatın quraşdırıldığı kabinetlə tanış olmuşlar.
Bölmənin digər xəbərləri
