Yuqrada Sibir neftinin ilk kəşfiyyatçısı Fərman Salmanov haqqında film çəkmək təklif olunub
Moskva, 15 aprel, AZƏRTAC
Əvvəllər müasir şimal şəhərlərinin yerləşdiyi ərazidə Sibir çaylarının axarının dəyişdirilməsi layihəsi çərçivəsində su anbarı yaradılması planlaşdırılırdı. Lakin Fərman Salmanovun qətiyyəti və bölgədə neft ehtiyatlarının olduğuna inamı sayəsində tamamilə başqa bir qərar qəbul edildi ki, bu da bütöv bir regionun iqtisadiyyatını və gələcəyini dəyişdi.
AZƏRTAC xəbər verir ki, bu barədə “Kino və yerin təkindəki sərvətlər. Yeni dövrün qəhrəmanının axtarışında” adlı müzakirə zamanı Yuqra vilayətinin qubernatoru Ruslan Kuxaruk məlumat verib.
Onun sözlərinə görə, 1950-ci illərin sonunda Qərbi Sibirdə neft tapan geoloq Fərman Salmanovun qəhrəmanlığı Xantı-Mansi Muxtar Dairəsinin taleyini dəyişib. “Biz
anlayırıq ki, məhz bu insanın cəsarəti və inadkarlığı sayəsində neft tapıldı və nəticədə bu ərazi təkcə Rusiyanın deyil, dünyanın da aparıcı neft-qaz bölgələrindən birinə çevrildi”, - deyə R.Kuxaruk qeyd edib.
Hazırda Rusiyada hasil edilən neftin 40 faizdən çoxu məhz Yuqra bölgəsində çıxarılır, dünya hasilatında payı isə təxminən 5 faiz təşkil edir.
Bölgə rəhbərliyi məşhur azərbaycanlı geoloq Fərman Salmanovun xidmətlərini kinoda əbədiləşdirməyi planlaşdırır. Qubernator onun və komandası haqqında bədii filmin çəkilməsini təklif edib.
Onun sözlərinə görə, film ilk kəşfiyyatçıları tərənnüm etməli, neftçi peşəsinin nüfuzunu artırmalı və eyni zamanda, həm əmək veteranları, həm də gənclər üçün maraqlı olmalıdır.
Qeyd edək ki, daha əvvəl Fərman Salmanov haqqında film çəkmək planlarından “SurgutInform-TV” şirkətinin baş prodüseri, “Solivs” şirkətinin direktoru Oleq Uruşev danışmışdı. Filmin çəkiliş məkanı kimi Surqut şəhəri nəzərdən keçirilir.
Fərman Salmanovun adı artıq Tümen vilayətində əbədiləşdirilib. 2019-cu ildə Surqut şəhərinin hava limanına rəsmi olaraq onun adı verilib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
