ZAQATALANIN 40 YAŞLI TARİX-DİYARŞÜNASLIQ MUZEYİ
AZƏRTAC-ın müxbiri xəbər verir ki, Zaqatala şəhərində tarix-diyarşünaslıq muzeyinin yaradılmasının 40 illik yubileyinə həsr olunmuş təntənəli mərasim keçirilmişdir. Mərasimdə mədəniyyət və turizm nazirinin müavini Sevda Məmmədəliyeva iştirak etmişdir.
Mədəniyyət və Turizm Nazirliyinin rəsmiləri, rayon rəhbərliyi və ictimaiyyətin nümayəndələri əvvəlcə muzeylə tanış olmuşlar. Qonaqlara məlumat verilmişdir ki, tarix-diyarşünaslıq muzeyi 1967-ci ildə yaradılmışdır. Muzeyin fondunda 4261 ədəd eksponat saxlanılır. Ekspozisiya zalının sahəsi 185 kvadratmetrdir və burada 537 eksponat nümayiş etdirilir. Tarix-diyarşünaslıq muzeyi 5 şöbədən ibarətdir. Burada müxtəlif dövrlərdə sənətkarlar tərəfindən düzəldilmiş məişət və kənd təsərrüfatı alətləri, toxuculuq məmulatları, dulusçuluq nümunələri, geyimlər, bəzək əşyaları və digər eksponatlar nümayiş etdirilir. Ən qədim eksponat eramızdan əvvəl III minilliyə aid olan kəsici alətdir. Muzeydə 16 nəfər əməkdaş çalışır.
Muzeylə tanışlıqdan sonra nazir müavini Xatirə kitabına ürək sözlərini yazmışdır. Sonra Sevda Məmmədəliyeva və Zaqatala Rayon İcra Hakimiyyətinin başçısı Asif Əsgərov muzeyin əməkdaşları ilə xatirə şəkli çəkdirmişlər.
Daha sonra Zaqataladakı “İS” hotelinin həyətində muzeyin yaradılmasının 40 illiyinə həsr olunmuş yubiley tədbiri keçirilmişdir. Mərasimdə çıxış edən nazir müavini Sevda Məmmədəliyeva muzeyin yubileyinin 18 may - Beynəlxalq Muzeylər günü ilə eyni vaxta təsadüf etməsini əlamətdar hadisə kimi qiymətləndirmişdir. Nazir müavini hazırda Mədəniyyət və Turizm Nazirliyi tərəfindən muzeylərin fəaliyyətini yaxşılaşdırmaq məqsədi ilə xüsusi proqram hazırlandığını və həmin sənədə Zaqatala muzeyi ilə bağlı bəndlərin salınacağını xüsusi olaraq diqqətə çatdırmışdır. S.Məmmədəliyeva tədbir iştirakçılarını muzeyin yubileyi ilə bağlı mədəniyyət və turizm nazirinin xüsusi əmrinin mətni ilə tanış etmiş, bir qrup əməkdaşa nazirliyin pul mükafatlarını vermişdir.
Rayon icra hakimiyyətinin başçısı Asif Əsgərov çıxış edərək muzeyin əməkdaşlarını əlamətdar yubiley münasibətilə təbrik etmiş, muzeyə 2 ədəd kompyuter dəsti, hədiyyələr və pul mükafatları təqdim etmişdir.
Muzeyin direktoru Şüay Xəlilov yubileyin yüksək səviyyədə keçirilməsinə göstərdikləri köməyə görə Mədəniyyət və Turizm Nazirliyinin rəhbərliyinə və rayon icra hakimiyyətinə dərin minnətdarlığını bildirmişdir.
Yubiley mərasimi maraqlı konsert proqramı ilə davam etdirilmişdir.
Bölmənin digər xəbərləri
