Çexiyada yeniyetmələr süni intellektdən ən çox təhsil üçün istifadə edirlər
Praqa, 10 fevral, AZƏRTAC
Çexiyada uşaqlar və yeniyetmələr süni intellekt (Sİ) alətlərindən əsasən tədris prosesində fəal şəkildə yararlanırlar. Masarik Universitetinin Sosial elmlər fakültəsinin ekspertləri tərəfindən Təhlükəsiz İnternet Günü münasibətilə yayımlanan hesabatda bildirilir ki, respondentlərin təxminən 40 faizi Sİ-dən inşa yazmaqda, referatlar hazırlamaqda, eləcə də uzun mətnləri ümumiləşdirmək və izah etmək üçün köməkçi vasitə kimi istifadə edir.
Araşdırmaya görə, uşaqların 30 faizi süni intellektə tövsiyələr almaq üçün müraciət edir: nə ilə məşğul olmaq, nə izləmək, hansı musiqiyə qulaq asmaq və nə almaq kimi suallar üstünlük təşkil edir. Təxminən 20 faiz isə şəxsi problemlərini Sİ ilə bölüşür. Tədqiqat qrupunun üzvü Mariya Yaroslavaya görə, fiziki sağlamlıq və fitnes mövzularında ünsiyyət də kifayət qədər yayılıb.
Eyni zamanda, iştirakçıların 25 faizindən azı süni intellektdən şəkil və video yaradılması kimi yaradıcı məqsədlərlə istifadə etdiyini bildirib. Cəmi 4 faiz isə “deepfake” texnologiyası ilə məzmun yaratdığını etiraf edib.
Ekspert Yaroslav Bedroşovanın sözlərinə görə, oğlanlar və qızlar arasında fərqlər böyük deyil. Lakin qızlar daha çox problemləri və məsləhət istəkləri üçün Sİ-yə üz tutduğu halda, oğlanlar şəkil və video, o cümlədən “deepfake” məzmunun yaradılmasına daha çox maraq göstərirlər.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
