ELM VƏ TƏHSİL
Zəfər Günü: Unudulmayan tarix, gənc nəslin qürur yeri











Bakı, 6 noyabr, AZƏRTAC
Azərbaycan Respublikasının Prezidenti yanında Dövlət İdarəçilik Akademiyasının, DİA Tələbə-Gənclər Təşkilatının və DİA TGT “Müasir İdarəçilər” klubunun birgə təşkilatçılığı ilə şanlı Zəfərimizin dördüncü ildönümünə həsr olunmuş “8 Noyabr - Zəfər Günü: Unudulmayan tarix, gənc nəslin qürur yeri” mövzusunda tədbir təşkil olunub.
Azərbaycan Respublikasının Dövlət Himninin səsləndirilməsi ilə başlanan tədbirdə şəhidlərimizin əziz xatirəsi bir dəqiqəlik sükutla yad edilib.
AZƏRTAC xəbər verir ki, tədbiri açan DİA TGT “Müasir İdarəçilər” klubunun sədri Misir Məmmədov Zəfər Gününün əhəmiyyətini bir daha diqqətə çatdırıb. O, çıxışını Xalq artisti, şəhid atası Əli Nurun öz oğluna yazdığı “Salam, oğlum” şeirini səsləndirməklə yekunlaşdırıb.
Daha sonra çıxış edən DİA-nın İnzibati idarəetmə fakültəsinin dekanı, “Müasir İdarəçilər” klubunun ideya müəllifi və qurucusu dosent Elnur Əliyev şanlı Qələbənin əldə olunmasının nə qədər mürəkkəb olduğuna diqqət çəkib. O, bu Qələbədə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin və Azərbaycan Ordusunun qüdrətinin labüdlüyünü vurğulayıb. Eyni zamanda, bu Qələbədə ordu və xalq birliyi amillini xüsusi diqqətə çatdırıb.
Tədbirdə çıxış edən DİA TGT sədri İxtiyar Mahmudzadə tarixi anların şahidi kimi yaddaqalan məqamları, xatirələri gənclərlə bölüşüb.
Sonra isə tədbirin fəxri qonağı - yazıçı, publisist, jurnalist Aydın Tağıyev 8 Noyabr – Zəfər Gününün gənclər üçün milli qürur və vətənpərvərlik ruhu yaratmasından söhbət açıb, şanlı Zəfərin gənc nəsil üçün qəhrəmanlıq örnəyi olduğunu vurğulayıb, onların milli kimliyə və dövlətçiliyə bağlılığını gücləndirdiyini qeyd edib. Həmçinin gənclərin bu tarixi uğuru qoruyub gələcək nəsillərə ötürməsinin əhəmiyyətini xüsusi vurğulayıb.
Tədbirdə DİA-nın Tarix kafedrasının müdiri dosent Firdovsiyyə Əhmədova şanlı Zəfərə aparan yola tarixi nəzərə salıb, bu Zəfərin regionda yeni geosiyasi reallıqlar yaratdığını və Azərbaycan xalqının tarixi ədalətin bərpası uğrunda mübarizəsinin nəticəsi olduğunu qeyd edib.
Tarix elmləri doktoru Havva Məmmədova 8 noyabrın Azərbaycan xalqının tarixində qəhrəmanlıq simvoluna çevrildiyini və bu tarixi Qələbənin xalqın müstəqillik yolunda keçdiyi şərəfli yolun simvolu olduğunu da xüsusi vurğulayıb.
Daha sonra Vətən müharibəsi qazisi Zakir İmanov öz döyüş yolundan danışıb, xatirələrini bölüşüb, şanlı Qələbədən qürur duyduğunu bildirib.
Tədbirin sonunda Aydın Tağıyevin müəllifi olduğu “Zəfər” marşı səsləndirilib. Zəfər Gününə həsr olunmuş videoçarx nümayiş etdirilib.