ZƏNGİLAN RAYON İCRA HAKİMİYYƏTİNİN BAŞÇISI VƏLİ QULİYEVİN ÇIXIŞI
-Zati-aliləri möhtərəm cənab Prezident!
Qaçqınların və məcburi köçkünlərin problemləri ilə bağlı 2005-ci ilin iyun ayının 21-də Sizin sədrliyinizlə keçirilmiş müşavirədə qarşımıza qoyduğunuz vəzifələr, verdiyiniz çox dəyərli tövsiyələr ötən dövrdə bizim fəaliyyət proqramımız olmuşdur.
Sizin həmin müşavirədəki tapşırığınıza əsasən, Zəngilan rayonundan olan məcburi köçkünlərə yemək xərcinin bankomat vasitəsilə verilməsi çox qısa müddətdə, birinci olaraq başa çatdırılmışdır. Hazırda yemək xərci, pensiya və müavinətlər, idarə və müəssisələrdə isə əmək haqqı tamamilə bankomatlar vasitəsilə ödənilir.
Saatlı və Sabirabad rayonlarında çadırlarda, İmişli rayonunda vaqonlarda məskunlaşmış məcburi köçkünlərin yeni şəhərciklərə köçürülməsi barədə verdiyiniz tapşırıq əsasında, Sizin diqqətiniz və yaxından qayğınız nəticəsində Sabirabad rayonu ərazisində zəngilanlı məcburi köçkünlər üçün 161 ailəlik yeni müasir tipli qəsəbənin tikintisi başa çatdırılmışdır və ailələr hazırda qəsəbəyə köçürülür.
Möhtərəm cənab Prezident, göstərdiyiniz əvəzsiz qayğıya görə Sizə bütün zəngilanlıların, yeni qəsəbədə yaşayacaq sakinlərin dərin təşəkkürünü və sonsuz minnətdarlığını çatdırmaq istərdim.
Möhtərəm cənab Prezident!
Siz həmin müşavirədə bir sıra məsələlərlə yanaşı, həmçinin qeyd etmişdiniz ki, bizim uşaqlarımız gərək yaxşı, təmir olunmuş məktəblərdə oxusunlar. Sizin bu fikriniz respublikamızın hər bir yerində olduğu kimi, zəngilanlılarda da böyük ruh yüksəkliyi doğurmuşdur. Ötən müddətdə 3 məktəb binası, 6 məktəbdə əlavə sinif otaqları tikilmiş, 11 kompyuter dəsti, 214 adda 37 min 765 ədəd latın qrafikası ilə bədii əsərlər alınıb şagirdlərin istifadəsinə verilmişdir.
Rayonumuzun orta məktəblərində təhsil alan şagirdlərimiz mütəmadi olaraq Heydər Əliyev Fondu tərəfindən məktəbli ləvazimatları ilə təmin edilirlər. Bütün bunlara görə Heydər Əliyev Fonduna, onun prezidenti, YUNESKO və İSESKO-nun xoşməramlı səfiri, Milli Məclisin deputatı xanım Mehriban Əliyevaya təşəkkürümüzü bildiririk.
“Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər) təsdiq edilməsi haqqında” Sizin 2004-cü il 11 fevral tarixdə imzaladığınız Fərman, habelə müvafiq Sərəncamınızla təsdiq olunmuş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı” uğurla həyata keçirilir. Ötən müddətdə 763 yeni iş yeri açılmış, xeyli məcburi köçkün daimi və mövsümi işlə təmin olunmuşdur.
Möhtərəm cənab Prezident!
Məcburi köçkünlərimizdən 30 ailə Pirşağıda Elmi Tədqiqat Əkinçilik İnstitutunun yardımçı binalarında məskunlaşmışdır. Yaşayış şəraitinin yaxşılaşdırılması üçün həmin ailələrin imkan daxilində başqa münasib yerə köçürülməsinə kömək göstərilməsini xahiş edirəm.
Zati-aliləri, bütün xalqımız kimi, zəngilanlılar da ümummilli liderimiz Heydər Əliyevin ideyalarının həyata keçirilməsi, xalqın sosial və iqtisadi vəziyyətinin yaxşılaşdırılması sahəsində apardığınız məqsədyönlü fəaliyyətinizi ürəkdən bəyənir, dəstəkləyir və ətrafınızda sıx birləşmişlər. Zəngilanlılar dövlətçiliyə və öz Prezidentinə sədaqətlərini bundan sonra da nümayiş etdirəcəklər.
Bölmənin digər xəbərləri
