“Qırmızı Körpü” buraxılış məntəqəsində koronavirusa qarşı profilaktiki tədbirlər gücləndirilib - REPORTAJ VİDEO
Qazax, 1 fevral, AZƏRTAC
Çində yayılan koronovuirusla bağlı ölkəmizin qərb sərhədində yerləşən Qərb Ərazi Baş Gömrük İdarəsinin “Qırmızı Körpü” gömrük buraxılış məntəqəsi də güncləndirilmiş iş rejiminə keçib. Gün ərzində Gürcüstandan ölkəmizə gələn piyadalar və nəqliyyat vasitələri ciddi şəkildə yoxlanılır. Hələlik virusa yoluxma şübhəsi halı qeydə alınmayıb.
AZƏRTAC-ın müxbiri “Qırmızı Körpü” gömrük buraxılış məntəqəsində bununla bağlı görülən işlərlə maraqlanıb.
Gömrük baş leytenantı, inspektor Pərviz Bağırov Gürcüstandan gələn insanların ölkəmizə girişinin ciddi nəzarət altında təmin edildiyini bildirir: “Əsasən texniki nəzarət vasitələrindən istifadə olunur. Yəni termovizorlardan. Uzaq məsafədən vətəndaşın hərarəti ölçülür. Əgər hansısa fakt aşkarlanarsa, bu barədə Səhiyyə Nazirliyinin təcili tibbi briqadasına məlumat ötürülür. Həmin vətəndaşlar təcili tibbi yardım əməkdaşlarına təhvil verilirlər”.
Koronavirusla bağlı buraxılış məntəqəsinin girişində Gürcüstan ərazisindən Azərbaycana daxil olan nəqliyyat vasitələrinin şinləri dezinfeksiya olunur. Piyadalara isə məntəqədəki termovizorlar vasitəsilə nəzarət edilir. Bu avadanlıq hərarəti olan insanı dərhal aşkar edə bilir. Gücləndirilmiş iş rejimində çalışan buraxılış məntəqəsində çalışan əməkdaşlar isə maskalardan istifadə edirlər.
“Qırmızı Körpü” gömrük buraxılış məntəqəsindən onu da bildirdilər ki, virus təhlükəsi xəbəri yayılandan bu günədək virus daşıyıcısı ehtimal edilən vətəndaş qeydə alınmayıb.
Xatırladaq ki, yanvarın 27-də Azərbaycan Respublikasının Prezidenti İlham Əliyevin tapşırığına əsasən Nazirlər Kabinetində, Dünya Səhiyyə Təşkilatının və Çin Xalq Respublikası (ÇXR) hökumətinin elan etdiyi kimi, Çinin Uxan şəhərində yayılmış və artıq dünyanın başqa regionlarında da qeydə alınmış koronavirus epidemiyasına qarşı qabaqlayıcı tədbirlərin görülməsi üçün müşavirə keçirilib.
Müşavirənin yekununda sərhəd-keçid məntəqələrində gücləndirilmiş iş rejiminə keçilməsi, ÇXR-dən, xüsusilə epidemiya zonasından ölkəyə gələn bütün şəxslərin mütləq şəkildə ciddi tibbi müayinədən keçirilməsi və nəzarət altına alınması, xüsusi riskli hesab olunan və virusun keçə biləcəyi ərzaq məhsullarının siyahısının hazırlanması və ərzaq bazarında həmin məhsullara nəzarətin gücləndirilməsi, səhiyyə ocaqlarında qaynar xətlərin yaradılması, virus və onunla mübarizə metodları haqda əhali ilə maarifləndirmə işlərinin aparılması, vəziyyətlə bağlı əhaliyə mütəmadi məlumat verilməsi haqda qərar qəbul edilib.
Vurğulanıb ki, hazırda ölkəmizdə belə xəstəliyə yoluxma halları müşahidə olunmayıb, Azərbaycanda əhalinin sağlamlığı ilə bağlı vəziyyət dövlətin tam nəzarətindədir və narahatlıq üçün heç bir əsas yoxdur.
Qeyd edək ki, Çində bu virusa yoluxanların sayı 11 min 821 nəfərə çatıb, 259 nəfər dünyasını dəyişib, 1795 xəstə isə ağır vəziyyətdədir. Artıq 18 ölkədə bu virusa yoluxma halları qeydə alınıb.
Bölmənin digər xəbərləri
