İdxaldan asılılıq azaldılır, ixrac potensialı artırılır, milli tekstil brendləri yaradılır - “Mingəçevir Tekstil”dən reportaj VİDEO
Mingəçevir, 5 fevral, Rəşad Türkoğlu, AZƏRTAC
Prezident İlham Əliyevin sərəncamlarına əsasən Azərbaycanın bir neçə şəhərində iri sənaye parkları yaradılıb. Belə parkların yaradılması həm ölkə iqtisadiyyatının inkişafına, həm də işsizliyin aradan qaldırılmasına töhfə verir.
Pambıqçılıq mövsümünün yekunları və 2020-ci ildə görüləcək tədbirlərlə bağlı müşavirədə emal sənayesinin inkişaf etdirilməsinin vacibliyini vurğulayan dövlətimizin başçısı deyib: “Pambıqçılıq, həmçinin yüngül sənayeyə də təkan verir. Mənim sərəncamlarımla Azərbaycanın bir neçə şəhərində sənaye zonaları, sənaye parkları yaradılır, o cümlədən Mingəçevir şəhərində yüngül sənaye parkı. Buna böyük ehtiyac var. Çünki Mingəçevir şəhərində işsizlik başqa şəhərlərdən daha ciddidir, bu da təbiidir, çünki şəhərdir və şəhərdə işsizlik adətən daha çox olur. Ona görə Mingəçevirdə işsizliyin aradan qaldırılması üçün biz onu bir sənaye şəhəri kimi inkişaf etdirməliyik. Artıq orada iki böyük iplik fabriki fəaliyyət göstərir, mən onların açılışında olmuşam. Bu, birinci mərhələdir. Fabriklərin sayı çox olmalıdır və biz çalışmalıyıq ki, pambığı maksimum dərəcədə emal edək. Çünki bugünkü emal səviyyəsi bizi qane edə bilməz”.
AZƏRTAC-ın əməkdaşı “Mingəçevir Tekstil” MMC-də olub və iş prosesi ilə maraqlanıb.
İki il əvvəl Mingəçevir şəhərində yaradılan Mingəçevir Sənaye Parkındakı “Mingəçevir Tekstil” MMC ölkəmizdə yüngül sənayenin inkişafına hesablanıb. Burada istehsal olunan ipliklərin Open End və Ring növlərinə dünyada böyük tələbat var. Qısa bir zamanda istehsal edilən yüksəkkeyfiyyətli pambıq ipliklərin xarici bazarlara ixracına başlanılıb. 2018-ci ildə istehsala başlayan müəssisədə elə həmin il 4 min tona yaxın - təqribən 16 milyon manatlıq keyfiyyətli məhsul istehsal olunub ki, bunun da 13 milyon manat dəyərində olan 3 min tonu, yəni təqribən 80 faizindən çoxu ixrac edilib. Ümumilikdə, iki il ərzində Mingəçevir Sənaye Parkının daxili və xarici bazarlara satış həcmi 63.420,929 manat təşkil edib.
Mingəçevir Sənaye Parkındakı “Mingəçevir Tekstil” MMC-nin direktoru Mehman Hüseynov AZƏRTAC-a açıqlamasında bildirib ki, 2019-cu ildə ümumi satışın 6 min tonu Open End və 6 min tonu Ring növündə olmaqla, 12 min ton olub. Bunun da 2 min tonu daxili, 10 min tonu - təqribən 83 faizi xarici bazarda satılıb. Beləliklə, daxili bazara satış 7 milyon manat, ixrac isə 39 milyon manat olmaqla, ümumilikdə, 2019-cu ildə 46 milyon manat təşkil edib.
Mehman Hüseynovun sözlərinə görə, istehsal olunan məhsullar Rusiya, Türkiyə, Portuqaliya, Belçika, Ukrayna, Polşa və Pakistana göndərilib. Bu isə ölkəmizə əlavə xarici valyutanın daxil olması deməkdir.
Prezident İlham Əliyevin iştirakı ilə açılan müəssisə ölkədə yüngül sənayenin, xüsusilə də tekstil sənayesinin inkişafına, yerli istehsal müəssisələrinin davamlı, keyfiyyətli və ucuz xammalla təmin olunmasına, eləcə də istehsal edilən pambığın hazır məhsula çevrilərək ixracına şərait yaradır. “Mingəçevir Tekstil” MMC-nin direktoru bildirib ki, ilk aylarda daha çox xarici mütəxəssislərin təcrübəsindən istifadə olunurdusa, hazırda yerli mütəxəssislər üstünlük təşkil edir. Müəssisədə üçnövbəli iş rejimində 700-dən çox işçi və mütəxəssis çalışır.
Emal sənayesinin inkişafına töhfə verən “Mingəçevir Tekstil” kimi müəssisələrin sayı nə qədər çox olarsa, yüngül sənaye də inkişaf edər, iş yerləri yaradılar, hazır məhsul istehsal olunar. Fevralın 3-də “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransdakı nitqində bu məsələyə bir daha toxunan dövlətimizin başçısı bildirib ki, pambıqçılıq birbaşa emal sənayesini şərtləndirir: “Pambıqçılıqda 46 faiz artım var. İxrac keçən il 158 milyon dollar olubdur. Ancaq biz pambığın 50 faizini ölkəmizdə emal edə bilirik. Ona görə nə lazımdır, yeni iplik fabrikləri, ondan sonra tekstil fabrikləri, daha sonra hazır məhsul fabrikləri. Bu zəncir bir-birinə bağlıdır, ona görə sahibkarlar bu sahəyə diqqət yetirsinlər və dövlət orqanları sahibkarları bu istiqamətlərə yönəltsinlər. Beləliklə, yüngül sənayenin inkişafı təmin ediləcək, iş yerləri yaradılacaq, hazır məhsul istehsal edəcəyik, hazır məhsulu idxal etməyəcəyik. Aydın məsələdir, bunlar bir-biri ilə bağlıdır. Pul burada, ölkəmizdə qalacaq”.
Qeyd edək ki, Azərbaycanda son illərdə aparılan səmərəli və uğurlu iqtisadi islahatlar ölkəmizdə sahibkarlığın formalaşmasına, inkişafına, onun iqtisadiyyatdakı rolunun daha da artmasına geniş imkanlar açıb. Ötən illər ərzində sahibkarlara güzəştli şərtlərlə 2 milyard manatdan çox vəsait verilib. Sahibkarlığın inkişafı üçün dövlət bu il də kifayət qədər böyük vəsait nəzərdə tutur. Güzəştli şərtlərlə 200 milyon manata yaxın kredit ayrılacaq.
Bölmənin digər xəbərləri
