“Qubaekoaqrar” MMC-nin zavodunda istehsal olunan məhsullar ABŞ-a ixrac ediləcək REPORTAJ VİDEO
Quba, 8 fevral, Elxan Yusifli, AZƏRTAC
Prezident İlham Əliyev fevralın 3-də “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda çıxış zamanı kənd təsərrüfatında emal sektorunun vacibliyini xüsusi vurğulayıb. “Biz gərək hər şeyi ardıcıllıqla edək. Biz, əlbəttə ki, meyvə-tərəvəz məhsullarımızı tədarük edirik, ixrac edirik. Bu ixrac da artır, çox yaxşı. Ancaq emal olunmuş malların daha böyük dəyəri var. Dəyərlər zənciri yaradılmalıdır. Ona görə hesab edirəm ki, kənd təsərrüfatında emal sektoruna xüsusi diqqət göstərilməlidir”, - deyə dövlət başçısı bildirib.
AZƏRTAC-ın bölgə müxbiri “Qubaekoaqrar” Məhdud Məsuliyyətli Cəmiyyətinin kənd təsərrüfatı mallarının istehsalı zavodunda olub, görülən işlərlə maraqlanıb.
Zavodun direktoru Şahin Orucov müsahibəsində bildirib ki, ötən il 100 ton məhsul Rusiya Federasiyasına ixrac edilib. Bundan başqa, zavodun məhsulları Almaniya, Birləşmiş Ərəb Əmirlikləri, Cənubi Koreyada təşkil olunan beynəlxalq sərgilərdə nümayiş etdirilib və yüksək rəğbətlə qarşılanıb. Emal edilən məhsulların bir hissəsinin Amerika Birləşmiş Ştatlarına ixracı da planlaşdırılır. Zavodda istehsal olunan kompotlardan dörd çeşidinin bu ölkəyə göndərilməsi üçün razılıq əldə edilib. İstehsal olunan məhsullar xarici bazarlara “Made in Azerbaijan” brendi ilə çıxarılır.
“Qubaekoaqrar” MMC kənd təsərrüfatı mallarının istehsalı zavodu 2018-ci il oktyabrın 11-də Prezidenti İlham Əliyev və birinci xanım Mehriban Əliyevanın iştirakı ilə istifadəyə verilib.
Zavod sutkada 2 ton quru meyvə və 4 ton fındıq istehsalı gücünə malikdir. Burada meyvələrin qurudulması, fındığın qovrulması və qablaşdırılması, alma çipsi istehsalı xətləri quraşdırılıb.
Şahin Orucov bildirib ki, hazırda zavodda 29 çeşiddə mürəbbə, 10 çeşid kompot, bibər və pomidor tomatı, alma çipsi, alma qurusu istehsal olunur. Ümumilikdə, zavodun 44 çeşiddə məhsulu satış mərkəzlərində təqdim edilir.
Müəssisənin xammala olan tələbatı Quba və ətraf rayonlardan, həmçinin cənub zonasından tədarük edilən məhsullar hesabına ödənilir. Bu isə kiçik ailə təsərrüfatlarının inkişafına müsbət təsir göstərir və regionda yeni meyvə bağlarının salınmasına stimul yaradır. Meyvələrin emal olunaraq xarici bazarlara çıxarılması regionun ixrac potensialının artmasına da şərait yaradır.
“Qubaekoaqrar” MMC-nin kənd təsərrüfatı mallarının istehsalı zavodunda əhalidən tədarük edilmiş almalar ilk növbədə, çeşidlənir, yuyulur, içlikdən təmizlənir, dilimlənir və xüsusi qaydada qablaşdırılaraq qurudulması üçün sobaya yerləşdirilir. Sobada hər bir meyvə növünün xüsusiyyətləri nəzərə alınaraq onlar üçün proqramlaşdırılmış xüsusi rejimdə qurutma prosesi həyata keçirilir. Müəssisədə tələbata uyğun olaraq əsasən alma qurusu, həmçinin alma çipsi istehsal olunaraq müxtəlif çəkilərdə paketlənir. Meyvə quruları sənaye üsulu ilə istehsal olunduğu üçün dadına, əmtəə görünüşünə və yüksək səviyyədə qablaşdırılmasına görə fərqlənir.
Yaxın gələcəkdə zavodda xarici istehsal üçün nəzərdə tutulan məhsulların çeşidini artırmaq nəzərdə tutulub.
Hazırda zavodda gətirilən xammal birbaşa emal prosesinə yönləndirilir. Gələcəkdə isə müəssisənin xammala tələbatının davamlı olaraq ödənilməsinin təmin edilməsi məqsədilə tutumu 2 min ton olan soyuducu anbar kompleksinin qurulması, mövcud istehsal gücünün 2 dəfə artırılması nəzərdə tutulur.
Regionda belə emal müəssisəsinin yaradılması dünyanın qabaqcıl texnologiya və təcrübələrinin tətbiqinə, kənd təsərrüfatında ixracyönümlü və rəqabətqabiliyyətli məhsul istehsalına, yeni meyvə bağlarının salınmasına, eləcə də ixrac həcminin çoxalmasına və coğrafiyasının genişləndirilməsinə töhfə verməklə yanaşı, məşğulluğun artırılmasına da səbəb olur. “Qubaekoaqrar” MMC-nin kənd təsərrüfatı mallarının istehsalı zavodunda 50 nəfərə yaxın yerli sakin işlə təmin edilib.
Bölmənin digər xəbərləri
