CƏMİYYƏT
2018-ci il teleradio yayımı sahəsində də ciddi uğurlar ili oldu
Bakı, 4 yanvar, AZƏRTAC
Yola saldığımız 2018-ci il Azərbaycan üçün bütün sahələrdə olduğu kimi, teleradio yayımı sahəsində də çox ciddi uğurlar ili oldu.
Milli Televiziya və Radio Şurası sədrinin müavini Qafar Cəbiyev AZƏRTAC-a bildirib ki, Prezident İlham Əliyevin diqqət və qayğısı sayəsində teleradio fəaliyyətinin qanunvericilik bazasının daha da təkmilləşdirilməsi və bu sahənin texniki imkanlarının durmadan yaxşılaşdırılması istiqamətində olduqca mühüm addımlar atıldı. 2013-cü və 2015-ci illərdə kosmosa çıxarılmış “Azerspace-1” və “Azersky” peyklərinin ardınca ötən il üçüncü rabitə peykimiz - “Azerspace-2” də kosmosa göndərildi. Bununla da Azərbaycan dünyanın kosmik ailəsində öz yerini getdikcə daha artıq möhkəmləndirmiş oldu.
Şuranın sədr müavini deyib: “Məlum olduğu kimi, ötən il noyabr ayının 1-də Prezident tərəfindən “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərman imzalandı. Fərmanda deyildiyi kimi, televiziya və radio kanallarında, internet resurslarında, mətbu nəşrlərdə və reklam daşıyıcılarında ədəbi dilin normalarının kobud şəkildə pozulması, leksik və qrammatik qaydalara əməl edilməməsi, məişət danışığından istifadə olunması, əcnəbi söz və ifadələrin yersiz işlədilməsi az qala adi hala çevrilib. Bu sahədə hüquqi tənzimləmənin və daimi nəzarətin olmaması dil pozuntularının azaldılması və aradan qaldırılması istiqamətində təsirli tədbirlər görməyə imkan vermir. Hazırda Fərmana əsasən, dövlətimizin başçısının şəxsən özünün sədri olduğu Dövlət Dil Komissiyası yanında Monitorinq Mərkəzi publik hüquqi şəxsin yaradılması gündəmdədir. Bu isə o deməkdir ki, teleradio yayımçılarının dövlət dilindən istifadəsinin monitorinqləri artıq təkcə Teleradio Şurası tərəfindən deyil, həm də Monitorinq Mərkəzi tərəfindən, özü də daha peşəkar səviyyədə aparılacaq. Bu isə lap yaxın gələcəkdə Azərbaycan efirinin dil xətalarından təmizlənəcəyindən, bütövlükdə ədəbi dil normalarına daha həssaslıqla əməl olunacağından xəbər verir.
2018-ci ildə Milli Məclis tərəfindən “Hərbi vəziyyət haqqında” və “Tütün məmulatlarının istifadəsinin məhdudlaşdırılması haqqında” Azərbaycan Respublikası qanunlarının tələblərinə uyğun olaraq “Televiziya və radio yayımı haqqında” Qanuna da müvafiq dəyişiklik və əlavələr olunub. Qanuna yeni əlavə olunmuş 40.2.2-1 maddəsində tütün məmulatlarının və tütün istifadəsi prosesinin nümayiş etdirilməməsi, həmçinin tütün məmulatlarının və tütün istifadəsi prosesinin nümayiş etdirildiyi əsərlərin, tamaşaların, proqramların efirdə, kabel yayımı vasitəsilə açıq yayımlanmaması nəzərdə tutulur. Qanunun 40.3-cü maddəsinin tələbinə görə isə teleradio yayımçıları tütündən istifadənin və sağlamlığa zərər vuran digər vərdişlərin mənfi təsiri barədə müvafiq icra hakimiyyəti orqanlarının, elm müəssisələrinin və qeyri-hökumət təşkilatlarının dəstəyi ilə xəbərdaredici, maarifləndirici və tərbiyəvi mövzuda verilişlər hazırlayır və bu mövzulara ayda 90 dəqiqədən az olmayan efir vaxtı ayırırlar. Bu verilişlərin 45 dəqiqəsi saat 17.30-23.00 arasında olmaqla, saat 08.00-23.00 arasında yayımlanır və verilişlərin surəti hər ay Milli Televiziya və Radio Şurasına təhvil verilir. Yəqin ki, diqqətli tamaşaçılar və dinləyicilər son vaxtlar efirdə bu sahədə də yetərincə dəyişikliklər baş verdiyini özləri hiss ediblər”.
Qafar Cəbiyev bildirib ki, ölkənin teleradio yayımçıları ailəsinin sıralarının artım dinamikası ötən il də davam etdirildi. ARB-24 və Real-TV xəbər kanalları efirə çıxdı. Neçə-neçə İP televiziyası fəaliyyət üçün xüsusi razılıq – lisenziya aldı. Beləliklə də sovet dönəmində cəmi bir televiziyası və bir radiosu olan Azərbaycanda bu gün 11 ümumrespublika yayımçısı olan televiziya, 13 regional televiziya, 4 peyk yayımçısı olan televiziya, 17 kabel televiziyası, 28 İP televiziya, ümumrespublika yayımçısı olan 13 radio və 3 regional radio fəaliyyət göstərir. İnsanları maarifləndirən, onları məlumatlandıran, düşündürən və həm də əyləndirən bu nəhəng infrastrukturda 10 min nəfərdən çox mütəxəssis çalışır. Bu yolla da Azərbaycan həqiqətləri dünyaya, dünya reallıqları isə Azərbaycan insanına çatdırılır.
Göründüyü kimi, müstəqillik illərində Azərbaycanda teleradio fəaliyyəti sahəsi həm kəmiyyət, həm də keyfiyyət göstəriciləri baxımından qibtə olunacaq dərəcədə böyük və sürətli inkişafa nail olub. Bu isə qarşıdakı illərdə daha da irəli getmək və daha ciddi uğurlara imza atmaq baxımından çox yaxşı bir təməldir. İndi qarşıda duran əsas vəzifə mövcud potensialdan maksimum səmərə ilə istifadə etmək, yaxşılara, mütərəqqilərə güvənərək Azərbaycan tamaşaçısını və dinləyicisini daha keyfiyyətli və daha cəlbedici veriliş və proqramlarla məmnun etməkdən ibarətdir.