“20 İLDİR UNUTMURUQ” İNTERNET AKSİYASINA START VERİLMİŞDİR
Bakı, 19 yanvar (AZƏRTAC). Yanvarın 19-da Gənclər üçün Təhsil Mərkəzi 20 Yanvar faciəsinin ildönümü ilə əlaqədar “20 ildir unutmuruq” adlı internet aksiyasına start vermişdir.
İkigünlük aksiyanın əsas məqsədi Azərbaycan gəncləri adından dünya ictimaiyyətinə, xüsusilə də beynəlxalq təşkilatlara 20 Yanvar faciəsi ilə bağlı həqiqətləri çatdırmaq, 20 il əvvəl baş vermiş faciəyə hüquqi-siyasi qiymət verilməsini tələb etməkdir.
Mərkəzin rəhbəri Vüsal Quliyev 1990-cı il yanvarın 20-də xalqımıza qarşı törədilmiş qanlı aksiyadan 20 il keçməsinə baxmayaraq, dünya ictimaiyyətində hələ də dolğun informasiya olmadığını söyləyərək demişdir: “20 Yanvar faciəsi xalqımızın azadlıq mübarizəsinin qəhrəmanlıq salnaməsidir. Bu gün tariximizə qanlı səhifə kimi daxil olmuşdur”.
Əvvəlcədən müəyyən edilmiş cədvələ uyğun olaraq, gənclər növbəli qaydada internet vasitəsilə 20 Yanvar faciəsini əks etdirən məqalə, foto, bəyanat və digər materialların dünyanın müxtəlif nöqtələrinə, beynəlxalq təşkilatların elektron ünvanlarına, populyar internet səhifələrə, əcnəbi qəzet və jurnallara göndərilməsinə başlamışlar.
Qeyd edək ki, aksiya Azərbaycanla yanaşı, xaricdə təhsil alan mərkəz üzvləri tərəfindən dünyanın müxtəlif ölkələrində də həyata keçirilir.
Bölmənin digər xəbərləri
