20 YANVAR - XALQIMIZIN ƏN AÇI VƏ ƏN ŞƏRƏFLİ GÜNÜDÜR
Bakı, 19 yanvar (AZƏRTAC). Yanvarın 19-da M.F.Axundov adına Milli Kitabxanada 20 Yanvar şəhidlərinə həsr olunmuş “Şəhidlər. Biblioqrafiya” kitabının təqdimatı keçirilmişdir.
Kitabxananın direktoru Kərim Tahirov bildirmişdir ki, kitabda əsrlər boyu xalqımızın başına gətirilən müsibətlər 20 Yanvar, Xocalı soyqırımı və Qarabağ müharibəsi haqqında məlumat verilmişdir. Kitabın redaktoru G.Səfərəliyeva, tərtibçilər M.Məmmədova, A.Əliyevadır.
Kitabda Vətənimizin müstəqilliyi və suverenliyi, torpaqlarımızın bütövlüyü uğrunda həyatlarını qurban vermiş şəhidlər haqqında dövri mətbuatda dərc olunmuş materiallar toplanmışdır.
Azərbaycan Respublikasının İnsan Hüquqları üzrə müvəkkili Elmira Süleymanova, Mədəniyyət və Turizm Nazirliyi aparatının rəhbəri Firudin Qurbanov, nazirliyin şeir sektorunun müdiri şair Çingiz Əlioğlu 20 Yanvar faciəsinin xalqımızın taleyində ən acı və ən şərəfli gün adlandırmışlar. Həmin gün Vətən torpağı xalqımızın igid oğullarının qanı ilə suvarılmış, müstəqilliyimizin təməli qoyulmuşdur.
Milli Məclisin deputatları Havva Məmmədova, Tahir Rzayev, Aqil Abbas hələ də bu qanlı terrorun səbəbkarlarının öz layiqli cəzalarına çatmadığını bildirmişlər.
Bölmənin digər xəbərləri
