20 YANVAR FACİƏSİ QAN YADDAŞIMIZDA DAİM YAŞAYACAQDIR
Bakı, 19 yanvar (AZƏRTAC). Bakı Dövlət Universitetində (BDU) 20 Yanvar faciəsinin ildönümü ilə bağlı mərasim keçirilmişdir.
İştirakçılar burada şəhidlərin xatirəsinə ucaldılmış abidənin önünə əklil və gül dəstələri qoymuş, onların xatirəsini yad etmişlər.
Mərasimdə BDU-nun rektoru, Milli Məclisin deputatı, akademik Abel Məhərrəmov 1990-cı il yanvarın 19-dan 20-nə keçən gecə imperiya ordusunun ölkəmizdə qanlı hadisələr törətdiyini bildirmişdir. O müdhiş gecədə azadlıqsevər yüzlərlə insan amansızcasına qətlə yetirilmişdir.
Rektor 20 Yanvarın xalqımızın qan yaddaşında daim yaşayacağını vurğulamışdır.
A.Məhərrəmov xatırlatmışdır ki, ilk dəfə dahi şəxsiyyət, ulu öndər Heydər Əliyevin təşəbbüsü ilə 20 Yanvar faciəsinə hüquqi-siyasi qiymət verilmişdir.
Professor İzzət Rüstəmov, digər çıxış edənlər də Qara Yanvar qırğınının dəhşətlərindən danışmış, ölkəmizin müstəqilliyi, suverenliyi yolunda canlarından keçən şəhidlərin xatirəsinin əziz tutulduğunu bildirmişlər.
Sonra “Azadlıq yolunun şanlı səhifəsi” mövzusunda ədəbi-bədii kompozisiya nümayiş etdirilmişdir.
######
Bölmənin digər xəbərləri
