“20 YANVAR FACİƏSİ ŞAHİD JURNALİSTLƏRİN GÖZÜ İLƏ” MÖVZUSUNDA “DƏYİRMİ MASA” KEÇİRİLMİŞDİR
Bakı, 19 yanvar (AZƏRTAC). Yanvarın 19-da Mətbuat Şurasında “20 Yanvar faciəsi şahid jurnalistlərin gözü ilə” mövzusunda “dəyirmi masa” keçirilmişdir.
Tədbirdə faciənin şahidi olmuş jurnalistlər, KİV rəhbərləri və ictimaiyyət nümayəndələri iştirak etmişlər.
“Dəyirmi masa”da 20 Yanvar faciəsindən əvvəl və sonrakı proseslərin, dəhşətli olayı doğuran səbəblərin jurnalist yaradıcılığına təsirinə, hazırkı dövrdə medianın bu qanlı qırğını işıqlandırması xüsusiyyətlərinə dair fikir mübadiləsi aparılmışdır.
Şuranın sədri Əflatun Amaşov 20 Yanvar faciəsinin tarixi haqqında məlumat vermiş və bu hadisənin Azərbaycan xalqının qəhrəmanlıq salnaməsinin parlaq səhifələrindən biri olduğunu vurğulamışdır.
Çıxış edən jurnalistlər şahidi olduqları faciənin dəhşətlərindən danışmış, keçmiş sovet ordusunun günahsız insanlara qarşı törətdiyi vəhşiliklərin bəşər tarixində görünməmiş qanlı hadisə olduğunu qeyd etmişlər. Bildirilmişdir ki, 20 Yanvar hadisələri yalnız ümummilli lider Heydər Əliyevin hakimiyyətə qayıdışından sonra siyasi-hüquqi qiymətini almışdır.
Tədbir iştirakçılarına faciənin 20-ci ildönümünə həsr olunmuş “20 Yanvar: Güllələnmiş qəzet” kitabı paylanmışdır.
Bölmənin digər xəbərləri
