QAN YADDAŞI
20 YANVAR FACİƏSİ XALQIMIZIN QAN YADDAŞIDIR
Bakı, 19 yanvar (AZƏRTAC). Yanvarın 19-da Azərbaycan Dövlət Torpaq və Xəritəçəkmə Komitəsində (ADTXK) 20 Yanvar faciəsinin 20-ci ildönümü ilə əlaqədar tədbir keçirilmişdir.
Azərbaycanın müstəqilliyi və azadlığı uğrunda canlarından keçmiş şəhidlərin xatirəsi bir dəqiqəlik sükutla yad edilmişdir.
Tədbirdə ADTXK-nın sədri Qərib Məmmədov çıxış edərək bildirmişdir ki, Azərbaycanın qəhrəmanlıq səhifələrindən biri olan 20 Yanvar faciəsi xalqımızın qan yaddaşıdır. Yanvarın 19-dan 20-nə keçən gecə siyasi hakimiyyətdə olan qüvvələrin özbaşınalığından istifadə edən sovet qoşunları xalqımıza qarşı misli görünməmiş qətliam törətmişlər. Bunun nəticəsində 137 nəfər amansızcasına qətlə yetirilmiş, 700-ə yaxın soydaşımız yaralanaraq əlil olmuşdur. 20 Yanvar faciəsinə siyasi-hüquqi qiymət yalnız ulu öndər Heydər Əliyev hakimiyyətə qayıtdıqdan sonra verilmişdir.
Tədbirdə çıxış edənlər xüsusi vurğulamışlar ki, Azərbaycanın müstəqilliyi və azadlığı uğrunda canından keçmiş şəhidlərimizin əziz xatirəsi xalqımızın yaddaşında daim yaşayacaqdır.