20 YANVAR FACİƏSİNİN İYİRMİNCİ İLDÖNÜMÜ İLƏ ƏLAQƏDAR ASTANADA MƏRASİM KEÇİRİLMİŞDİR
Astana, 19 yanvar (AZƏRTAC). Azərbaycanın Qazaxıstandakı səfirliyi Astanadakı İqtisadiyyat, Maliyyə və Beynəlxalq Ticarət Universitetində 20 Yanvar faciəsinin iyirminci ildönümü ilə əlaqədar anma mərasimi keçirmişdir.
Tədbirdə universitetin professor-müəllim heyəti, tələbələr, səfirliyin əməkdaşları, Azərbaycan-Qazaxıstan Dostluq və Mədəniyyət Assosiasiyasının üzvləri, diasporumuzun nümayəndələri iştirak etmişlər.
Mərasimdə 20 Yanvar şəhidlərinin xatirəsi bir dəqiqəlik sükutla yad olunmuşdur.
Tədbiri giriş sözü ilə açan Qazaxıstan-Azərbaycan Mədəniyyət və Dostluq Assosiasiyasının prezidenti Asxat Şakirov 20 Yanvar qırğınını pisləmiş, bunu Azərbaycan xalqının azadlıq və müstəqillik uğrunda mübarizəsini boğmaq cəhdi kimi qiymətləndirmişdir.
Azərbaycanın Qazaxıstandakı səfiri Lətif Qəndilov 20 Yanvar hadisələrinin tarixi, faciənin törənmə səbəbləri haqqında ətraflı məlumat vermiş, Dağlıq Qarabağla bağlı ermənilərin iddiaları barədə danışmışdır.
1986-ci ilin dekabrında Almatı hadisələri ilə 20 Yanvar faciəsi arasında oxşarlıq olduğunu deyən səfir bunun sovet imperiyasının milli respublikalara qarşı apardığı şovinist siyasətin nəticəsi olduğunu bildirmişdir. Səfir demişdir ki, Mixail Qorbaçovun imperialist siyasəti Azərbaycan xalqının iradəsini, milli azadlıq əzmini qıra bilmədi. Səfir qeyd etmişdir ki, o vaxt Moskvada yaşayan ümummilli liderimiz Heydər Əliyev Azərbaycanın daimi nümayəndəliyinə gələrək mətbuat konfransı keçirmiş, bu qanlı faciənin məsuliyyətini Mixail Qorbaçovun üzərinə qoymuşdur.
Universitetin prorektoru, professor Tuleuqali Burbayev Azərbaycan və Qazaxıstan arasında ənənəvi dostluq, qardaşlıq münasibətlərindən danışmış və sovet rejimi tərəfindən xalqlarımıza qarşı törədilmiş bu amansızlığı ittiham etmişdir.
Almatı şəhərində 1986-cı ilin dekabr hərəkatının başçısı Aksar Saqnayev çıxış edərək bu hadisələri milli azadlıq hərəkatının başlanğıcı kimi qiymətləndirmişdir.
Sonra iştirakçılara 20 Yanvar hadisələrinə dair məlumatlar toplusu paylanmışdır.
Qulu Kəngərli
AZƏRTAC-ın xüsusi müxbiri
Astana
Bölmənin digər xəbərləri
