20 YANVAR ŞƏHİDLƏRİ UNUDULMUR
Bakı, 19 yanvar (AZƏRTAC). Yanvarın 19-da M.Ə.Sabir adına kitabxana-klubda 20 Yanvar faciəsinin 20-ci ildönümünə həsr olunmuş “Əbədiyyətə gedən yol” adlı anım mərasimi keçirilmişdir.
Şəhidlərin xatirəsi bir dəqiqəlik sükutla yad edilmişdir.
Kitabxananın direktoru Firəngiz Bəkirzadə Azərbaycan xalqına qarşı törədilmiş 20 Yanvar qətliamının XX əsrin ən dəhşətli hadisəsi, keçmiş sovetlər ittifaqının xalqları əsarətdə saxlamaq siyasətinin tərkib hissəsi olduğundan danışmış, azadlıq carçıları - 20 Yanvar şəhidlərinin heç zaman unudulmayacağını, xalqımızın qan yaddaşında əbədi yaşayacağını vurğulamışdır.
Bakıdakı 191 saylı orta məktəbin müəllimi Leyla Əzimova, şəhid Aslan Ağaverdiyevin qızı Afaq Əzimova və başqaları həmin günlə bağlı xatirələrini bölüşmüş, şəhidlərə, şəhid ailələrinə göstərilən hörmət və ehtirama görə Azərbaycan xalqına və Prezident İlham Əliyevə minnətdarlıqlarını bildirmişlər.
191 və 257 saylı məktəblərin şagirdləri şəhidlərin xatirəsinə həsr olunmuş ədəbi-bədii kompozisiya göstərmişlər.
Kitabxananın foyesində Qara Yanvar faciəsini əks etdirən “Biz sizdən öyrəndik qəhrəmanlığı” adlı fotosərgi təşkil olunmuşdur.
Bölmənin digər xəbərləri
