20 Yanvar tarixi Azərbaycan xalqını birliyə səsləyən gündür
Bakı, 18 yanvar, AZƏRTAC
Azərbaycan tarixində unudulmaz, yaddaşlara əbədi həkk olunan günlər, tarixin səhifəsindən silinməz anlar çoxdur. 1990-cı ilin 20 Yanvarı Azərbaycan xalqı üçün təkcə böyük faciə deyil, eyni zamanda, milli qürur və milli fəxarət tarixi, canı, qanı ilə dastan yazdığı gündür. Ölkəmizin ictimai-siyasi həyatına 20 Yanvar faciəsi kimi daxil olmuş bu günün xalqımızın milli yaddaş fəlsəfəsi, milli özünüdərk prosesində özünəməxsus yeri vardır. Tariximizdə bir sıra hadisələr vardır ki, bunlar xalqımızın milli mənlik şüurunda, həmçinin azərbaycançılıq ideologiyası təfəkküründə dərin və əbədi iz qoyub.
Bu fikirləri AZƏRTAC-a açıqlamasında Milli Məclisin deputatı Məzahir Əfəndiyev deyib.
Deputat bildirib ki, Azərbaycan xalqı 1990-cı ilin yanvar ayında televiziya ekranlarında öz həmvətənlərinin nə cür qəddarlığa məruz qalmasına dəhşətli şəkildə şahidlik edib. Ümumilikdə respublikada 147 nəfərin öldürülməsi, 744 nəfərin yaralanması, 841 nəfərin qanunsuz həbs olunması, 200 ev və mənzil, 80 avtomobil, o cümlədən təcili yardım avtomobilləri, dövlət əmlakının və şəxsi əmlakın məhv edilməsi ilə nəticələnən Qanlı Yanvar hadisələri Azərbaycan xalqına qarşı törədilmiş ən ağır hərbi cinayətlərdən biridir. M.Əfəndiyev qeyd edib: “1990-cı ildə yanvarın ortalarında SSRİ Müdafiə və Daxili İşlər nazirliklərinin, habelə digər xüsusi təyinatlı hərbi birləşmələrin 66 min nəfərdən çox əsgər və zabiti Bakı şəhərinə gətirilərək yerləşdirilmişdi. Azərbaycana göndərilən ordu hissələrinin tərkibinə erməni zabit və əsgərləri, hərbi məktəblərdə təhsil alan erməni kursantları da cəlb edilmişdi. 1966-cı ildə qəbul edilmiş “Mülki və siyasi hüquqlar haqqında” Beynəlxalq Aktın birinci bəndinə əsasən, fərman imzalandığı andan fövqəladə vəziyyətin tətbiqi və müddətləri barədə əhaliyə rəsmi xəbərdarlıq edilməli olmasına baxmayaraq, şəhər əhalisinə heç bir xəbərdarlıq edilməmiş və yalnız kütləvi insan qırğını törədildikdən sonra - yəni, 1990-cı il yanvarın 20-də səhər saat 5:30-da radio vasitəsilə fövqəladə vəziyyət tətbiq edildiyi barədə rəsmi məlumat efirə verilmişdir”.
M.Əfəndiyev diqqətə çatdırıb ki, faciədən sonra Azərbaycanda milli azadlıq hərəkatı dönməz xarakter aldı və xalq öz gələcəyini yalnız müstəqil Azərbaycanın yaranmasında gördü. Baş vermiş hadisələrdən sonra dünya azərbaycanlıları ilk dəfə olaraq milli faciəmizin tanıdılması naminə yaşadıqları müxtəlif ölkələrdə təşkilatlanmağa başladılar. O zamanlar bu proseslərə qiymət vermək, münasibət bildirmək həddindən artıq qorxulu məsələ idi. Amma buna baxmayaraq, 20 Yanvar hadisələri ilə bağlı ilk rəsmi etiraz ulu öndər Heydər Əliyev tərəfindən səsləndirildi. O, heç bir təhlükədən çəkinməyərək 1990-cı il yanvarın 21-də sovet rejiminin qadağalarına baxmayaraq, Azərbaycanın Moskvadakı daimi nümayəndəliyinə gəldi və qanlı faciənin təşkilatçılarını ictimaiyyət qarşısında ittiham edərək Azərbaycan xalqını birliyə səslədi. 20 Yanvar şəhidlərinin xatirəsinin əbədiləşdirilməsi, onların ailələrinin sosial müdafiəsinin gücləndirilməsi ilə bağlı ümummilli lider Heydər Əliyevin gördüyü böyük işlər, əsasını qoyduğu uğurlu siyasət Prezident İlham Əliyev tərəfindən bu gün də ləyaqətlə davam etdirilir. Baxmayaraq ki, qanlı faciənin baş verməsindən 32 il keçir, bu cinayəti törədən şəxslər hələ də məsuliyyətə cəlb olunmayıb və çox təəssüf, bir çox beynəlxalq təşkilatlar bu günədək susurlar. Əminəm ki, müstəqilliyimizin oyanışı tarixində baş vermiş ağır cinayət hadisələrinə birmənalı hüquqi qiymət veriləcək.
“20 Yanvar tarixdə faciə, dəhşətli terror aktı kimi qalmaqla yanaşı, həm də dövlətimizin başçısının vurğuladığı kimi, Azərbaycan tarixinin qəhrəmanlıq səhifəsidir. Həmin ağır gündə bütün hədələrə, təhdidlərə, ölümlə üz-üzə dayanmasına baxmayaraq, xalqımız lazım gələrsə, müstəqillik, azadlıq uğrunda canından keçə biləcəyini də göstərdi. Buna görə də 20 Yanvar faciəsi Azərbaycan xalqının yaddaşından heç vaxt silinməyəcək. İstər 20 Yanvar şəhidlərinin, istərsə də Birinci və İkinci Qarabağ müharibələri şəhidlərinin xatirəsi daim anılacaq və qədirbilən xalqımızın qəlbində əbədi yaşayacaqdır”, - deyə deputat fikirlərini yekunlaşdırıb.
Bölmənin digər xəbərləri
