Seulda Ümummilli Liderin 100 illiyi və Müstəqillik Günü qeyd olunub VİDEO
Pekin, 31 may, AZƏRTAC
Seulda Ümummilli Lider Heydər Əliyevin 100 illik yubileyi və Müstəqillik Günü münasibətilə tədbir keçirilib.
AZƏRTAC xəbər verir ki, tədbirdə Koreya Respublikasının dövlət və hökumət rəsmiləri, müxtəlif qurumların rəhbər şəxsləri, o cümlədən Koreya Beynəlxalq Əməkdaşlıq Agentliyinin prezidenti Li Yun-yonq, Koreya İdxalatçılar Assosiasiyasının prezidenti Kim Byonq-kvan, Koreya Beynəlxalq Ticarət Assosiasiyasının vitse-prezidenti Kim Gi-hyon, Koreyada işgüzar səfərdə olan Azərbaycan Konstitusiya Məhkəməsinin sədri Fərhad Abdullayev, Seulda akkreditə olunmuş diplomatik missiyaların rəhbərləri, media nümayəndələri, aparıcı şirkətlərin, elm və təhsil ocaqlarının, beyin mərkəzlərinin təmsilçiləri, ictimaiyyət nümayəndələri və həmvətənlərimiz iştirak ediblər.
İki ölkənin Dövlət himnləri səsləndikdən sonra çıxış edən səfir Ramin Həsənov və Diasporla İş üzrə Dövlət Komitəsinin sədri Fuad Muradov Ümummilli Lider Heydər Əliyevin zəngin irsindən söz açıb, onun mürəkkəb tarixi və siyasi sınaqlar fonunda xalqımızı sarsılmaz qətiyyətlə inkişafa doğru aparan qüdrətli liderliyindən bəhs ediblər. Heydər Əliyevin mükəmməl idarəçilik bacarığı və vətənpərvərliyi sayəsində Azərbaycanın bütün sahələrdə əhəmiyyətli tərəqqiyə nail olduğu vurğulanıb.
Çıxışlarda, həmçinin Müstəqillik Gününün əhəmiyyətindən danışılıb, Azərbaycan Xalq Cümhuriyyəti dövründə əldə olunmuş nailiyyətlər barədə məlumat verilib. 1918-ci ildə müsəlman Şərqində ilk demokratik respublikanın məhz Azərbaycanda yarandığı, qısa mövcudluğu dövründə ölkədə siyasi-iqtisadi islahatların həyata keçirildiyi, demokratik institutların təsis olunduğu qeyd edilib.
Xalq Cümhuriyyətinin mövcudluğunun uzun sürmədiyi və bolşevik işğalı nəticəsində Azərbaycanın 71 il keçmiş Sovet İttifaqının tərkibində olduğu diqqətə çatdırılıb. Vurğulanıb ki, 1991-ci ildə dövlət müstəqilliyini bərpa edən Azərbaycan müstəqilliyin ilk illərində siyasi və iqtisadi problemlərlə yanaşı, Ermənistanın işğalına məruz qalıb. Ümummilli Lider Heydər Əliyevin uzaqgörən siyasəti və təcrübəsi sayəsində ölkəmiz çətin vəziyyətdən xilas olaraq inkişaf mərhələsinə qədəm qoyub.
Bildirilib ki, Prezident İlham Əliyevin uğurlu xarici siyasəti nəticəsində Azərbaycan hazırda bütün dünyada hörmətlə qarşılanan bir ölkəyə çevrilib. 2020-ci ildə 44 günlük Vətən müharibəsində Müzəffər Ali Baş Komandanın rəhbərliyi altında Azərbaycan ordusu ölkəmizin ərazi bütövlüyünü bərpa edib.
Azərbaycan-Koreya əlaqələrinə toxunan natiqlər ötən dövrdə ölkələrimizin sıx ikitərəfli münasibətlər qurmağa nail olduğunu, qarşılıqlı təmas və mübadilələrin diplomatik təmsilçilik, ali və yüksək səviyyəli səfərlər, müxtəlif əməkdaşlıq mexanizmləri və layihələri ilə özünü büruzə verdiyini vurğulayıb.
Hazırda Azərbaycan ilə Koreya Respublikası arasında xüsusilə iqtisadi sahədə əməkdaşlığın inkişafı üçün geniş imkanların mövcudluğu qeyd olunaraq, azad edilmiş Azərbaycan ərazilərində aparılan bərpa-quruculuq işlərindən, nəzərdə tutulan layihələrdən söhbət açılıb. Azərbaycan rəhbərliyinin Koreya şirkətlərini həmin quruculuq işlərində iştiraka dəvət etdiyi bildirilib.
Koreya Respublikası xarici işlər nazirinin ictimai məsələlər üzrə müavini Lim Su-sok, Koreya-Azərbaycan parlamentlərarası əlaqələr üzrə işçi qrupunun rəhbəri So Byonq-su Azərbaycan xalqını təbrik ediblər. Çıxışlarda Azərbaycanın tarix boyu Asiya və Avropa arasında ticarət və mədəni mübadilələrdə körpü rolu oynamasından, 1918-ci ildə Azərbaycan Xalq Cümhuriyyətinin qurulmasının dünya tarixində və eləcə də demokratiyanın inkişafında xüsusi məna daşımasından bəhs olunub. Həmçinin dövlət müstəqilliyinin bərpasından sonra Azərbaycanın sürətli və dinamik inkişaf etdiyi vurğulanıb.
Qeyd edilib ki, coğrafi baxımdan bir-birindən uzaqda yerləşsələr də, Koreya ilə Azərbaycan arasında çoxsaylı mədəni, emosional və linqvistik bənzərliklər mövcuddur. Bu bağlılıqlara əsaslanan iki ölkə 1992-ci ildə diplomatik əlaqələr yaradaraq, indiyədək müxtəlif sahələr üzrə uğurla əməkdaşlıq edib. Koreyanın bundan sonra da Azərbaycanın tərəqqisi yolunda ölkəmizlə tərəfdaşlıq niyyəti diqqətə çatdırılıb, iki ölkənin daha parlaq gələcək quracağına inam ifadə olunub.
Səfirliyimizin təşkilatçılığı və Azərbaycan Diasporuna Dəstək Fondunun dəstəyi ilə keçirilən tədbirdə Xalq artisti Mircavad Cəfərovun rəhbərlik etdiyi “Cəngi” qrupunun ifasında Azərbaycanın etno-caz musiqi nümunələrindən ibarət konsert təqdim olunub.
Tədbir ümummilli lider Heydər Əliyevin 100 illiyi və Müstəqillik Gününə həsr olunan ziyafətlə davam edib.
Tədbirin keçirildiyi binanın foyesində Ümummilli Lider Heydər Əliyevin zəngin irsindən bəhs edən kitab və materiallardan ibarət sərgi təşkil olunub.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
