Bonnda Muxtar Babayev Braziliyanın COP30 gənc iqlim çempionu ilə görüşüb VİDEO
Bonn, 16 iyun, AZƏRTAC
Bonn şəhərində keçirilən BMT-nin İqlim Dəyişmələri üzrə Çərçivə Konvensiyasının (UNFCCC) növbəti sessiyası çərçivəsində COP30-un hazırlıq prosesi ilə bağlı Azərbaycan Prezidentinin iqlim məsələləri üzrə nümayəndəsi, COP29-un sədri Muxtar Babayevin, COP29-un Gənclər İqlim Çempionu Leyla Həsənovanın COP30-un gənc iqlim çempionu Marsele Oliveyra (Marcele Oliveira) və onun komandası ilə görüşü keçirilib.
AZƏRTAC xəbər verir ki, görüşdə Muxtar Babayev COP prosesində gənclər təşkilatları ilə səmərəli əməkdaşlığın qurulmasının xüsusi əhəmiyyətini qeyd edib. Muxtar Babayev gənclərin həm milli, həm də beynəlxalq səviyyədə proseslərə daha fəal cəlb olunmalarının vacibliyini vurğulayıb.
“Artıq 150 gündən az müddət qaldığını nəzərə alsaq, gənclərin bu iqlim platformasındakı rolu olduqca çətindir. Gənclər həm tərəflər, həm rəhbərlik, həm də gənclər və uşaqlar arasında körpü rolu oynayırlar. Həmçinin COP30-un media strategiyasının hazırlanması çox vacibdir. İqlim məsələləri ilə bağlı yalnız ekoloji sahədə deyil, bütün dünyada, xüsusilə də gənclər və uşaqlar arasında maarifləndirmə işləri aparılmalıdır. Bu məqsədlə güclü kommunikasiya və media resursları səfərbər edilməlidir”, - deyə M.Babayev əlavə edib.
COP29-un Gənclər üzrə İqlim Çempionu Leyla Həsənova çıxışında qeyd edib ki, iqlim dəyişikliyi ilə mübarizədə gənclərin iştirakı həlledici əhəmiyyət daşıyır. O, ötən il Azərbaycanda keçirilmiş “COP29 İqlim Dəyişikliyi üzrə Yay Düşərgəsi”nin uğurlarını vurğulayaraq bildirib ki, 35 ölkədən 75 gənc müəllim bu təşəbbüsdə iştirak edib və iqlim elmi üzrə maarifləndirmə təlimlərinə qatılıb. Onun sözlərinə görə, bu cür təşəbbüslər gənclərin iqlim proseslərinə fəal qoşulmalarına imkan yaradır.
Leyla Həsənova, həmçinin COP30 çərçivəsində Braziliya ilə əməkdaşlıq etməyə hazır olduqlarını və növbəti iqlim düşərgəsinin birgə təşkili üçün tərəfdaşlıq təklif etdiklərini diqqətə çatdırıb.
COP30-un Braziliya nümayəndəsi, gənclər üzrə nümayəndə Marsele Oliveyra çıxışında “Mutirão” təşəbbüsünün əhəmiyyətinə toxunub. O bildirib ki, bu təşəbbüs gənclərin və yerli icmaların birgə fəaliyyətini təşviq edir. “Bizim əsas məqsədimiz yalnız yüksəksəviyyəli qərarverici şəxslərlə deyil, həm də məktəblərdə, kəndlərdə, Amazon meşəsində yaşayan gənclərlə birbaşa əlaqə qurmaqdır”, - deyən M. Oliveyra əlavə edib ki, COP30-un Belemdə – Amazon regionunda keçirilməsi bu prosesin daha da aktuallaşmasına səbəb olacaq. “Biz bu COP-u dünyanın sonu yox, yenidən doğuş fürsəti kimi görürük”, - deyə o bildirib.
Tədbirin yekununda iştirakçılar COP30 hazırlıqları çərçivəsində ortaq fəaliyyət planının hazırlanması, regional məsləhətləşmələrin keçirilməsi və gənclər üçün platformaların gücləndirilməsi barədə razılığa gəliblər.
Sonda braziliyalı gənc iqlim çempionu bütün verilən məsləhətlərə və göstərilən dəstəyə görə COP29 Sədrliyinə təşəkkürünü bildirib.
Qeyd edək ki, COP30 sammiti 2025-ci ilin noyabrında Braziliyanın Belem şəhərində keçiriləcək.
Bölmənin digər xəbərləri
