Nazir: Aqrar sahə iqlim dəyişikliklərinə qarşı mübarizədə əsas prioritet olaraq qalır VİDEO
Bakı, 1 oktyabr, AZƏRTAC
Biz bu gün Bakıda iqlim fəaliyyəti üzrə qlobal hərəkata şahidlik edirik. Bu prosesin üçüncü dalğası kənd təsərrüfatı, su, nəqliyyat və ağıllı şəhərlər üzrə iqlim davamlılığına yönəlib. Bu mənada qadınların liderliyinin iqlim fəaliyyətində mərkəzi rolu xüsusi əhəmiyyət daşıyır.
AZƏRTAC xəbər verir ki, bu sözləri kənd təsərrüfatı naziri Məcnun Məmmədov Bakı İqlim Fəaliyyəti Həftəsində çıxışı zamanı deyib.
Nazir bildirib ki, iqlim dəyişikliyinin təsirlərinə qarşı mübarizədə qadın və gənclərin, həmçinin kənd yerlərində yaşayan icmaların bilik və bacarıqlarla təmin olunması mühüm vəzifədir.
“Bizim məqsədimiz kənd təsərrüfatı təşəbbüslərinin parçalanmaması, əksinə, birləşərək dayanıqlı nəticələrə gətirib çıxarmasıdır. Bu baxımdan fermerlərin, xüsusilə qadınların və gənclərin gücləndirilməsi prioritet istiqamətlərimizdəndir”, - deyə nazir vurğulayıb.
Məcnun Məmmədovun sözlərinə görə, rəqəmsal transformasiya və ağıllı texnologiyalar kənd təsərrüfatında müasir yanaşmaların əsasını təşkil edir: “2018-ci ildən etibarən nazirlik xidmətlərin rəqəmsallaşdırılmasını sürətləndirib. Fermerlər “eagro” platforması vasitəsilə əsas xidmətlərə çıxış imkanı əldə ediblər. COVID-19 pandemiyası dövründə bu sistemlərin əhəmiyyəti özünü aydın göstərdi. Hazırda 30-dan çox praktiki tətbiqi əhatə edən ikiillik rəqəmsal yol xəritəsi hazırlanır. Əkin sahələrinin xəritələşdirilməsi, torpaq monitorinqi, suya qənaətli suvarma texnologiyaları və digər layihələr yaxın zamanda geniş tətbiq ediləcək”.
Bölmənin digər xəbərləri
