Berlində Nərmin Nəcəflinin solo konserti - “Narın içində not” VİDEO
Berlin, 17 noyabr, AZƏRTAC
Almaniyada yaşayan azərbaycanlı gənc pianoçu Nərmin Nəcəflinin Berlində “Narın içində not” adlı solo konserti keçirilib. Azərbaycan Diasporuna Dəstək Fondunun dəstəyi ilə təşkil edilən və milli musiqimizin Avropada təbliği məqsədi daşıyan konsert dahi bəstəkarımız Üzeyir Hacıbəylinin 140 illik yubileyinə həsr olunub.
AZƏRTAC xəbər verir ki, konsertdə Azərbaycanın Almaniyadakı səfirliyinin və Berlindəki Azərbaycan Mədəniyyət Mərkəzinin əməkdaşları, diaspor nümayəndələri və yerli musiqisevərlər iştirak ediblər.
Nərmin Nəcəfli gecədə Azərbaycanın görkəmli bəstəkarları Üzeyir Hacıbəyli, Qara Qarayev, Tofiq Quliyev, Vaqif Mustafazadə, Fərhad Bədəlbəyli, Adil Bəbirov, həmçinin Frederik Şopen və Frans List kimi dünyaşöhrətli Avropa bəstəkarlarının məşhur əsərlərini səsləndirib. Konsertdə Üzeyir Hacıbəylinin “Sevgili canan”ı zərif lirizmi ilə iştirakçıları duyğulandırıb, Qara Qarayevin “Don Kixot” simfonik qravürlərindən olan “Səyahət” əsəri isə dinamizmi ilə auditoriyanın zövqünü oxşayıb. Tofiq Quliyevin “Lirik Vals”ı romantik nəfəsi ilə salonda yumşaq harmoniya yaradıb, Vaqif Mustafazadənin “Düşüncə”si isə improvizasiya zənginliyi ilə dinləyicilərə dərin emosional anlar yaşadıb.
Bu əsərlər sanki müxtəlif rənglərdən ibarət musiqi mozaikası kimi səslənməklə auditoriyanın ruhuna toxunub, konsert zalında unudulmaz atmosfer yaradıb. Məhz buna görə də gənc pianoçunun peşəkar ifası tamaşaçılar tərəfindən dəfələrlə gurultulu alqışlarla qarşılanıb.
Tamaşaçılar, eləcə də gecədə iştirak qatılan yerli ictimaiyyətin nümayəndələri konsertin onlarda unudulmaz təəssürat oyatdığını vurğulayıblar.
Konsertlə bağlı təəssüratlarını AZƏRTAC-la bölüşən almaniyalı gənc musiqiçi Rixard Liebert deyib: “Bugünkü konsert mənim üçün çox ilhamverici oldu. Bir çox yeni əsərlər dinlədim. Sözün düzü, Azərbaycan bəstəkarlarının əsərləri ilə tanış deyildim. Bu konsert məni daha çox araşdırmağa və özüm üçün yeni əsərlər kəşf etməyə həvəsləndirdi. İfaçının tərzi o qədər qeyri-adi və təsirli idi ki, insanın ruhuna toxunurdu. Həqiqətən inanılmaz dərəcədə gözəl idi”.
Konsertin proqramının böyük hissəsinin Azərbaycanın klassik musiqi əsərlərinin təşkil etdiyini vurğulayan R.Liebert bildirib: “Bu, mənə xüsusilə xoş təsir bağışladı. Elə əsərlər vardı ki, onları əvvəllər bir dəfə eşitmişdim, buna baxmayaraq, yenidən böyük maraqla dinlədim. Özümü tamamilə musiqinin içində hiss etdim və o sanki məni özü ilə apardı və ilhamlandırdı”.
Konserti izləyən Sara və Mel də Nərmin Nəcəflinin ifasına heyranlıqlarını bildiriblər. Sara öz fikirlərini bu cür ifadə edib: “Biz tamamilə heyran qaldıq, o, inanılmaz dərəcədə istedadlı gənc xanımdır. Buraya bir dostumuz vasitəsilə gəlmişik və Nərmini tanımırdıq. Amma onun ifası elə təsir etdi ki, bizi özünə çəkdi və dərindən təsir etdi. Bu axşam evə xoş əhvali-ruhiyyə ilə qayıdacağıq və bu konserti yenidən gözləyəcəyik”.
Mel isə konsert barədə fikirlərini belə bölüşüb: “Deməliyəm ki, çox xoş təəssürat oyatdı. Özüm də bir vaxtlar piano çalmağa cəhd etmişəm və bunun nə qədər çətin olduğunu bilirəm. Nərmin dedi ki, dörd yaşından piano çalır. Mən deyərdim ki, o, qeyri-adi istedada malikdir. Buradakı performansı həqiqətən çox təsirli idi”.
Nərmin Nəcəfli media nümayəndələrinə açıqlamasında konsertə uzun müddət hazırlaşdığını vurğulayaraq söyləyib: “Uzun müddət idi ki, Berlində solo konsert vermək arzusunda idim. Konsertin adını da xeyli vaxtdır düşünmüşdüm: “Narın içində not”. Nar Azərbaycanın əsas rəmzlərindən biridir. Bu, mənim adımla da müəyyən mənada bənzərlik təşkil edir. Mən bu konsertin noyabrda keçirilməsinə çalışırdım. Çünki noyabrın 8-də Vətən müharibəsində Qələbəmizin beşinci ildönümünü qeyd etdik. Bu il dahi bəstəkarımız Üzeyir Hacıbəylinin də 140 illik yubileyi qeyd olunur. Ona görə də konsertin proqramında Azərbaycan bəstəkarlarının – Üzeyir Hacıbəyli, Qara Qarayev, Tofiq Quliyev, Fikrət Əmirov, Vaqif Mustafazadə, Adil Bəbirovun əsərlərinə üstünlük verdim. Çox şadam ki, konsert uğurlu oldu. Konsertin uğurla reallaşdırılması üçün göstərdiyi dəstəyə görə Azərbaycan Diasporuna Dəstək Fonduna dərin minnətdarlığımı bildirirəm”.
Qeyd edək ki, Nərmin Nəcəfli 8 yaşından etibarən milli musiqi irsimizi xaricdə uğurla təmsil edir. O, indiyədək ABŞ, Almaniya, Belçika, İngiltərə, İtaliya, Fransa, Polşa, İsveçrə, Niderland, Estoniya, Litva, Rusiya və Gürcüstanda keçirilən beynəlxalq müsabiqə, festival və konsertlərdə böyük uğurla çıxış edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
