İQTİSADİYYAT
AĞDAŞIN QƏRİBLİ KƏNDİNƏ TƏBİİ QAZ VERİLƏCƏKDİR
Ağdaş, 4 mart (AZƏRTAC). Ağdaş rayonunda əhalinin təbii qazla təminatını yaxşılaşdırmaq məqsədi ilə görülən təmir-bərpa işləri davam etdirilir. “Azəriqaz” İB-nin Ağdaş Qaz İstismar Sahəsindən bildirmişlər ki, rayon mərkəzindən 40 kilometr aralıda yerləşən və 17 ildən bəri təbii qaz sarıdan əziyyət çəkən Qəribli kəndinin 1.100-ə yaxın sakini təbii qazla təmin ediləcəkdir. Hazırda qaz xətləri təmir edilir, yararsız hissələri yeniləri ilə əvəz edilir. Kənddə mənzillərin qazlaşdırılması üçün 10 kilometrlik köhnə qaz xəttinin bərpası, yeni qazpaylayıcı və tənzimləyici qurğuların quraşdırılması, 200 fərdi abonentin sayğacla təmin edilməsi nəzərdə tutulur. Yaxın vaxtlarda mənzillərə sayğaclar quraşdırılacaqdır.
Xatırladaq ki, ötən il rayonun Dəhnəxəlil, İkinci Aral, Yeniarx, Binələr, Davudlu, Cardam və Xosrov kəndlərinə təbii qaz verilmişdir. Bununla da rayonda təbii qazla təmin olunan yaşayış məntəqələrinin sayı 34-ə, abonentlərin sayı isə 11 min 447-yə çatmışdır. 2009-cu ildə rayon üzrə istehlak olunmuş təbii qazın dəyərinin 78,7 faizi, yəni 1,2 milyon manat vəsait toplanmışdır.