“Tour d`Azerbaidjan-2014” beynəlxalq veloyürüşünün üçüncü mərhələsi keçirilmişdir VİDEO
Bakı, 9 may (AZƏRTAC, Ziyadxan Həsənov). Bu gün “Tour d`Azerbaidjan-2014” beynəlxalq veloyürüşünün üçüncü mərhələsi keçirilmişdir.
AZƏRTAC xəbər verir ki, bu mərhələdə idmançılar Qəbələ-Oğuz-Şəki-Oğuz-Qəbələ marşrutu üzrə 180 km məsafə qət etmişlər.
Finiş xəttinə hamıdan əvvəl Cənubi Afrika Respublikasının nümayəndəsi, “Qxubeka” komandasının üzvü Yusef Reqiqi çatmışdır. İkinci yeri sloveniyalı Matey Muqerli (“Adria Mobil” komandası, Sloveniya), üçüncü yeri İsveçin “Şimano” komandasının danimarkalı təmsilçisi Kristian Yensen tutmuşdur.
Veloyürüşün bu mərhələsinin qaliblərinə və mükafatçılarına prizləri turun Təşkilat Komitəsinin rəhbəri, Azərbaycan Velosiped İdmanı Federasiyasının vitse-prezidenti Sahib Ələkbərov və Azərbaycan veloyürüşçüsü Aleksandr Averin təqdim etmişdir.
Üç mərhələdən sonra avstraliyalı Uilyam Klark (“Drapac Professional Cycling” komandası) yenə də veloyürüşün lideri və göy maykanın sahibidir. Sloveniyalı Matey Maqerli (“Adria Mobil” komandası) iki mərhələnin yekunlarına əsasən sprintdə ən yaxşı nəticə göstərmişdir. Primoz Roqliç “Dağ kralı” və qırmızı maykanın sahibidir. İsveçin “Giant-Şimano” komandasını təmsil edən isveçli Fredrik Lyudviqson isə gənclər arasında ən yaxşı nəticə göstərərək, bənövşəyi lider maykasına sahib olmuşdur.
Əvvəlki mərhələdə olduğu kimi, bu gün də idmançıların marşrutu boyunca yerləşən yaşayış məntəqələrinin sakinləri veloyürüşçüləri alqışlamışlar.
“Tour d`Azerbaidjan-2014” veloyürüşündə birincilik uğrunda dünyanın 22 ölkəsini təmsil edən 25 komanda mübarizə aparır. Onlardan 8-i - “MTN-Qhubeka” (Cənubi Afrika Respublikası), “Caja Rural-Seguros RGA” (İspaniya), “Neri Sottoli”, “Androni Giocattoli” (İtaliya), “Drapac Professional Cycling” (Avstraliya), “Team Novo Nordisk” (ABŞ), “Rusvelo” (Rusiya) və “CCC Polsat-Polkowice” Polşa komandaları pro-kontinental lisenziya almışlar. Turnirdə Azərbaycanı “Synergy Baku Cycling Project” komandası təmsil edir.
Hazırda dünyada pro-kontinental lisenziyalı cəmi 17 komanda vardır. Onlardan 8-i “Tour d`Azerbaidjan-2014” veloyürüşündə iştirak edir.
Xatırladaq ki, turun birinci mərhələsində Niderland nümayəndəsi Kenni Van Hummel qalib gəlmişdir. Vitali Buts (Ukrayna) ikinci, David Viqano (İtaliya) üçüncü yeri tutmuşdur.
İkinci turda finiş xəttini birinci keçən Sloveniyanın “Adria Mobil” komandasının üzvü Primoz Roqliç olmuşdur. Avstraliyalı Uilyam Klark (“Drapac Professional Cycling”) ikinci, italiyalı Rafael Andreato (“Neri Sottoli”) üçüncü nəticə göstərmişdir.
Mayın 10-da “Tour d`Azerbaidjan-2014” beynəlxalq veloyürüşünün dördüncü turu keçiriləcəkdir. Bu mərhələdə idmançılar Qəbələ-Şamaxı-Pirqulu marşrutu ilə 115 km məsafə qət etməlidirlər.
Bölmənin digər xəbərləri
