Azərbaycanda ilk dəfə keçirilən milli qolf turnirinin qalibləri mükafatlandırılmışlar VİDEO
Quba, 7 iyun (AZƏRTAC, Elxan Yusifli). İyunun 7-də Azərbaycan Qolf Federasiyasının və Milli Qolf Klubunun birgə təşkilatçılığı ilə Azərbaycanda ilk dəfə milli qolf turniri keçirilmişdir.
AZƏRTAC xəbər verir ki, Quba şəhərində keçirilən turnirdə Azərbaycan vətəndaşları, ölkəmizdə əmək fəaliyyəti göstərən əcnəbilər, eyni zamanda, xarici ölkələrdən gəlmiş qolf həvəskarları iştirak etmişlər.
Ümummilli lider Heydər Əliyevin xatirəsinə həsr olunmuş bu mötəbər turnirin əsas məqsədi qolfçular üçün maraqlı və rəqabətli yarış təşkil etmək, ölkəmizdə təzəcə ayaq açan bu idman növünü daha geniş kütləyə çatdırmaq və Azərbaycanı yeni qolf ölkəsi kimi dünyaya təqdim etməkdən ibarətdir.
Azərbaycan Qolf Federasiyasının prezidenti Anar Məmmədov turnirin açılışında bildirmişdir ki, Azərbaycanda keçirilən belə mötəbər turnirlər qolfun inkişafında mühüm əhəmiyyət daşıyır. Qeyd olunmuşdur ki, gənc nəslin bu idman növünə marağını daha da artırmağa xidmət edən turnir, eyni zamanda, Azərbaycanı dünya qolf ictimaiyyətinə tanıdacaqdır.
Turnir 18 dəlikli “Mixed Stroke Play” formatında təşkil olunmuşdur. Bir mərhələdən ibarət olan turnirdə müxtəlif “handicap” göstəricisinə malik olan həvəskar qolfçular iştirak etmişlər. Turnirə qatılmış 50 oyunçudan 6 nəfəri həvəskar xanım qolfçu olmuşdur. Oyunçuların uğurlu iştirakı üçün təşkilatçılar tərəfindən bütün şərait yaradılmışdır. İştirakçılara turnirdən iki gün əvvəl təlim günləri təyin edilmiş, eyni zamanda, turnir iştirakçılarının rahatlığı üçün xüsusi nəqliyyat vasitələri ayrılmışdır.
Yarışda iştirak edən oyunçuların ödədikləri qeydiyyat haqları isə xeyriyyə məqsədləri üçün istifadə ediləcəkdir. Başqa sözlə, əldə edilən gəlir “Əlilliyə Erkən Yardım Portec Şəbəkəsi” İctimai Birliyinin dəstəyi ilə əlil uşaqlar üçün əlil arabalarının alınmasına sərf olunacaqdır.
Proqrama daxil olan digər xeyriyyə tədbiri isə “Nargis Fund” və “Olive Project” tərəfindən təşkil olunmuş xeyriyyə hərracıdır. Hərrac üçün “YAY!” Qalereyası və “Vault Prive” butiki öz əşyalarını təqdim etmişlər. Hərraca təqdim olunmuş incəsənət əsərləri arasında rəsm, heykəltəraşlıq nümunələri və kişi akssesuarları da vardır. Hərracdan əldə edilmiş gəlir “Nimann Pik” adlanan genetik xəstəliyin Azərbaycanda yeganə daşıyıcısı olan azyaşlı Şəhriyar Əliyevin müalicəsi üçün sərf olunacaqdır.
Gərgin mübarizə şəraitində keçən turnirə yekun vurulduqdan sonra qaliblərin mükafatlandırılması mərasimi keçirilmişdir. Mərasimdə ilk üç yeri qazanmış oyunçular kubok və müxtəlif mükafatlarla təltif olunmuşlar.
Turnirin qalibi adını Mahmut Köylü qazanmışdır. Young Vang Kim ikinci, Riçard Çarles Fut isə üçüncü olmuşlar.
Mükafatlandırma mərasimində Azərbaycan Qolf Federasiyasının prezidenti Anar Məmmədov qalibləri təbrik etmiş, onlara gələcək yarışlarda daha böyük nailiyyətlər arzulamışdır.
Federasiya rəhbəri qeyd etmişdir ki, milli qolf turniri yüksək səviyyəli yarış kimi yaddaşlarda qalacaqdır. Bu yarışda iştirak etmiş qolfçular yaradılan şəraitdən və turnirin gedişindən razı qalmışlar.
Anar Məmmədov bildirmişdir ki, Ulu öndər Heydər Əliyevin xatirəsinə həsr olunmuş yarış bundan sonra ənənəvi olaraq hər il keçiriləcəkdir. Gələcəkdə bu turnir müxtəlif kateqoriyalar üzrə təşkil olunacaqdır. Federasiya rəhbəri, həmçinin qeyd etmişdir ki, bu ilin avqust ayında Qubada daha bir mötəbər beynəlxalq qolf yarışı keçiriləcəkdir. Avqustun 28-dən sentyabrın 3-dək davam edəcək yarışa 150-dən çox peşəkar qolfçunun qatılacağı gözlənilir.
Bölmənin digər xəbərləri
