Mərhum şahmatçı Vüqar Həşimovun xatirəsinə həsr olunan beynəlxalq turnirə start verilib VİDEO
Bakı, 24 iyul, AZƏRTAC
İyulun 24-ü Azərbaycanın məşhur şahmatçısı Vüqar Həşimovun doğum günüdür. Tanınmış şahmatçı yaşasaydı, 29 yaşı tamam olacaqdı.
Bu münasibətlə iyulun 24-də görkəmli şahmatçı, qrossmeyster Vüqar Həşimovun xatirəsinə həsr olunan uşaqlar arasında beynəlxalq şahmat turnirinə start verilib.
AZƏRTAC xəbər verir ki, beynəlxalq turnirin iştirakçıları əvvəlcə ikinci Fəxri xiyabanda Vüqar Həşimovun məzarını ziyarət edərək onun xatirəsinə dərin ehtiramlarını bildiriblər. Komanda yoldaşları Avropa çempionunun keçdiyi həyat yolundan və şahmat yarışlarında qazandığı nailiyyətlərdən danışıblar.
Vüqarın atası Qasım Həşimov açılış mərasimində çıxış edərək turnirin əhəmiyyətindən danışıb: “Vüqar hər zaman arzulayırdı ki, Azərbaycanda uşaqlar arasında beynəlxalq şahmat turniri keçirilsin. Bu gün siz belə turnirlərdə iştirak etməklə bacarığınızı artıra bilərsiniz. Vüqarın xatirə turniri uşaqlar arasında artıq ikinci ildir keçirilir. Ümid edirəm ki, bu turnir hər il ənənəvi olaraq keçiriləcək. Vüqarın qısa, lakin şərəfli ömür yolu gənc şahmatçılarımıza nümunə olmalıdır. Bütün iştirakçılara uğurlar arzulayıram. Qoy, güclü qalib gəlsin”.
Vüqar Həşimovun komanda yoldaşı, Avropa çempionu Şəhriyar Məmmədyarov gənc şahmatçılar üçün Vüqarın karyerasını, onun partiyalarını dərindən öyrənməyin əhəmiyyətini vurğulayaraq bildirib: “Mən şahmatçı kimi onun karyerasına yaxşı bələdəm. Amma xüsusən uşaqlar onun partiyalarından öyrənməlidirlər. Elə ölkələr var ki, Vüqarın əldə etdiyi nəticələrə yalnız arzu kimi baxır. Onun qazandığı nailiyyətlər əksər şahmatçılar üçün əlçatmazdır. Vüqar daim komanda yoldaşlarına, xüsusən azyaşlı şahmatçılara kömək etməyə çalışırdı. O, böyük turnirlərdə heç vaxt bizi tək qoymazdı. Özü oynamadığı günlərdə bizə yardımçı olurdu. Bu gün onun yoxluğunu qəbul etmək çətindir. Biz onu daim xatırlayırıq. Uşaqlar Vüqardan öyrənməklə potensiallarını artırmalı, uğur qazanmalıdır. Bizim şahmata yeni başlayanda məşhur idmançılarla görüş əsl bayrama çevrilirdi. İndi uşaqların şahmat üzrə yığma komandamızın üzvləri ilə görüşmək, onlardan öyrənmək imkanı var. Etiraf edək ki, son on ildə yeni şahmatçılar yetişib və onlar uğurla çıxış edirlər. Artıq rəqabət vaxtıdır. Arzu edirəm ki, bizdən sonrakı nəsil daha güclü oyun nümayiş etdirərək ölkəmizi layiqincə təmsil edəcək”.
Çıxışlardan sonra turnirin təşkilatçısı qaydalar barədə məlumat verib.
Sonra Azərbaycan Respublikasının dövlət himni səsləndirilib və beynəlxalq turnir açıq elan olunub.
Bakıdakı 6 nömrəli məktəb-liseydə keçirilən yarışda 8-10-12 yaşadək oğlanlar və qızlar, o cümlədən dünya və Avropa çempionatlarının mükafatçıları, Azərbaycan birinciliyinin iştirakçıları və beynəlxalq əmsalı 1700-dən yüksək olan 110 şahmatçı mübarizə aparır. Beynəlxalq turnirdə Azərbaycan şahmatçılarla yanaşı, Rusiya, İran, Gürcüstan və Fransa təmsilçiləri də çıxış edirlər. Turnirin reytinq favoriti keçənilki yarışın bürünc mükafatçısı olan azərbaycanlı şahmatçı Məhəmməd Muradlıdır (2052). Beynəlxalq turnirin baş hakimi FİDE hakimi Cavanşir Bağırovdur.
Memorialın qalibi Vüqar Həşimov kuboku ilə təltif olunacaq. Birinci yeri tutan şahmatçı, eyni zamanda, “Baku Open 2015”, gümüş mükafatın sahibi isə “Naxçıvan Open 2016” beynəlxalq şahmat festivallarında ödənişsiz olaraq qalmaq və yemək imkanı əldə edəcəklər. Turnirdə, həmçinin müxtəlif nominasiyalar üzrə qaliblər də təltif olunacaq.
Xatırladaq ki, ötənilki turnirin qalibi Bakı şahmatçısı Kənan Qarayev olub.
Bölmənin digər xəbərləri
