İDMAN


Əsgərxan Novruzov: İnanıram ki, hər iki güləşçimiz Olimpiadanın finalına yüksələcək

Bakı, 13 oktyabr, AZƏRTAC 

Argentinanın paytaxtı Buenos-Ayresdə təşkil olunan Yeniyetmələrin III Yay Olimpiya Oyunlarında ölkəmizi təmsil edən güləşçilərin rəqibləri müəyyənləşib.

Bu barədə AZƏRTAC-a Azərbaycan Güləş Federasiyasından (AGF) məlumat verilib.

“B” qrupunda yer alan Şahanə Nəzərova (43 kq) bu gün Elena Heloisa Martines (Braziliya), Tolulop Kristina Oqunsanya (Nigeriya), Emili Şilson (ABŞ) və Justin Fanni Viquro (Fransa) ilə qarşılaşacaq.

“A” qrupunda qərarlaşan sərbəst güləşçimiz Turan Bayramov (65 kq) isə sabah əvvəlcə Tahi Pehi Eynsli Uesterli (Yeni Zelandiya), daha sonra isə İnayət Ullah (Pakistan) ilə münasibətləri aydınlaşdıracaq.

Yeniyetmələrdən ibarət yığmamızın baş məşqçisi Əsgərxan Novruzov açıqlamasında püşkün nəticəsini dəyərləndirib: “Olimpiadada proqnoz vermək çətindir. Ümumilikdə püşkün nəticəsindən razıyam. Düzdür, Şahanənin qrupdakı rəqiblərindən olan amerikalı güləşçi dünya çempionudur. Amma Nəzərova ilk turu buraxıb, sonra braziliyalı rəqiblə qarşılaşacaq. Sıralamanı münasib saymaq olar. Güləşçilərimizin əhval-ruhiyyəsi çox yüksəkdir. İnanıram ki, hər iki güləşçimiz Olimpiadanın finalına çıxacaq”.

Qeyd edək ki, reqlamentə əsasən, qrup qalibləri finala yüksələcək. “A” və “B” qrupunda ikinci yeri tutanlar isə bürünc medal uğrunda güləşəcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.