Maqomedrəsul Məcidov: Azərbaycanda idmana yüksək diqqət yetirilir
Moskva, 17 noyabr, AZƏRTAC
“Azərbaycanda idmanı çox sevir və təbliğ edirlər, idmançıları yaxşı tanıyır və onları sevirlər. Bu ölkədə bizim kimi legionerlərin köməyi ilə öz idmançılarını stimullaşdırır və səfərbər edirlər. Azərbaycanda idmana yüksək diqqət yetirilir”.
Azərbaycan boksçusu, Azərbaycan milli yığma komandasının üzvü, üçqat dünya çempionu Maqomedrəsul Məcidov bu fikirləri mətbuat konfransında söyləyib.
AZƏRTAC Dağıstanda çıxan “Novoye delo” qəzetinə istinadən xəbər verir ki, bu günlərdə Dağıstanın Akuşınski rayonunda yeniyetmələr arasında Maqomedrəsul Məcidovun mükafatları uğrunda respublika turniri keçirilib.
Akuşınski rayonunun rəhbərliyi və “Rostelekom” şirkəti tərəfindən təşkil edilmiş yarışlara respublikanın bütün şəhər və rayonlarından yeniyetmə boksçular dəvət edilmişdi. Turnirdə cəmi 145 idmançı iştirak edirdi. Qaliblərə və mükafatçılara fəxri fərmanlar, medallar və qiymətli mükafatlar təqdim edilib.
Yarışlar başlanandan əvvəl keçirilən mətbuat konfransında Maqomedrəsul Məcidov jurnalistlərin suallarına cavab verərək deyib: “Mən Dağıstan və Rusiya komandalarının heyətində də çıxış etmişəm, amma o vaxt heç bir dəstək görmədim. Ailəmi dolandırmaq lazım idi, mən hətta boksu atıb, bir iş tapmağa hazırlaşırdım. Elə bu anda Azərbaycandan təklif aldım. Məni sınaq sparrinqinə dəvət etdilər, onların xoşuna gəldim, beləcə, Azərbaycan komandalarının heyətində çıxış etməyə başladım”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
