ELM VƏ TƏHSİL
Xaçmaz rayonunun Uzunoba və Köhnə Xaçmaz kəndlərində yeni məktəb binaları istifadəyə verilmişdir
Xaçmaz, 15 sentyabr (AZƏRTAC ). “Bilik günü” Xaçmaz rayonunun Uzunoba və Köhnə Xaçmaz kəndlərində yeni məktəb binalarının açılış mərasimləri keçirilmişdir.
AZƏRTAC xəbər verir ki, açılışlarda Milli Məclisin deputatları A. Əşrəfov və İ.Əliyev, rayon rəhbərliyi, təhsil işçiləri, kənd sakinləri iştirak etmişlər. Mərasimlərdə iştirak edənlər məktəblərin maddi-texniki bazasının möhkəmləndirilməsi istiqamətində rayonda görülən işlərdən danışmış , dövlətin təhsil sahəsinə diqqətini vurğulamışlar. Qeyd edilmişdir ki , son illər rayonda müasir tələblərə uyğun çoxlu məktəb binaları tikilmiş, şəhər 1 nömrəli uşaq bağçası körpələrin ixtiyarına verilmişdir. Hazırda Müzəffəroba kəndində 180 yerlik məktəb binasının tikintisi davam etdirilir.
Üçmərtəbəli, 640 yerlik Köhnə Xaçmaz məktəbinin, ikimərtəbəli, 480 yerlik Uzunoba məktəbinin binaları rəmzi lentlər kəsildikdən sonra şagirdlərin ixtiyarına verilmişdir. Məktəb binalarının sinif otaqları, fənn kabinələri, laboratoriya, idman zalı və yeməkxanaları müasir səviyyədə qurulmuş, lazımı avadanlıqla təchiz edilmişdir.