® Ülkər Xıdırova: Bizim üçün önəmli olan işi gözəl şəkildə vaxtında təhvil verməkdir
Hazırda dünyanın ən tələbatlı peşələrindən biri interyer dizayner hesab olunur. Artıq illərdir ki, aktuallığını qoruyan bu sahə ölkəmizdə də sürətlə inkişaf edir və sözsüz ki, bu peşədə çalışan şəxslər müasir, kreativ düşüncəyə, estetik zövqə malik olmalıdırlar. Müsahibimiz istedadlı və peşəkar interyer dizayner, "Ulkar Khidirova Interior" şirkətinin təsisçisi və rəhbəri Ülkər Xıdırovadır.
- Necə oldu ki, bu peşəni seçdiniz? Niyə məhz interyer dizayner olmaq qərarına gəldiniz?
- Dizayner olmaq uşaqlıq arzum idi. Amma o zamanlar interyer dizayn sahəsi o qədər çox dəbdə deyildi və demək olar ki, Azərbaycanda inkişaf etməmişdi. Ona görə də daha çox moda sahəsinə meyilli idim. Amma illər keçirdi və mən hiss edirdim ki, gələcəkdə rəssamlıqla əlaqəli bir peşədə çalışacağam, çünki uşaqlıq illərindən şəkillər çəkirdim və rəsm əsərlərinə böyük marağım var idi.
Bir neçə ildən sonra Azərbaycanda bu sahə daha çox tanındı və inkişaf etməyə başladı. Artıq universitetdə oxuduğum zaman qərar verdim ki, gələcək peşəm məhz interyer dizayn sahəsi ilə bağlı olacaq. Belə də oldu və bu istiqamətdə təhsil alaraq sözügedən sahənin sirlərinə yiyələndim.
- Dizayn layihələrinizi hansı üslublarda işləməyi xoşlayırsınız?
- Daha çox minimalizm üslubunu sevirəm. Amma zövqlər müxtəlifdir və bir çox hallarda bu məsələdə müştərinin fikirləri də önəmli hesab olunur. Hazırda klassika, neoklassika və luxury üslublar çox geniş yayılıb, onlara böyük tələbat var və biz də məcbur qalırıq ki, daha çox bu üslublarda işləyək.
- Layihələrinizin əksəriyyəti lüks mənzillər, apartamentlər və bağ evləridir. Bir sözlə, daha çox şəxsi müştərilərdir. Korporativ müştərilərlə də işləyirsiniz? Kafelər, restoranlar, otellər, ofislər? Hansı daha maraqlıdır?
- Düzdür, daha çox mənzillər və villaların interyer dizaynı ilə məşğul oluruq. Amma tələbatdan asılı olaraq digər sifarişləri də götürürük. İşlərimiz arasında idman zalları, dövlət obyektləri, kafe və restoranlar, otellər kimi bir çox layihələr var. Bizim üçün önəmli olan işi gözəl şəkildə vaxtında təhvil verməkdir. Hazırda məsələn, bank layihəmiz də var və onu uğurla reallaşdırırıq.
- Razılaşın ki, indi geyim modası mebel dizaynına, üslubuna, rənglərinə böyük təsir göstərir. Siz dəb dünyasının tendensiyalarını izləyib dizayn layihələrinizdə onlardan istifadə edirsiniz?
- Açığını desəm, geyim məsələsində dəblə ayaqlaşmaq daha asandır. Çünki geyim elədir ki, dəbdən düşürsə geyinməyə bilərsən. Mən şəxsən evlərdə dəbə riayət etməyi çox sevmirəm. Ev elədir ki, burada təmir bir neçə aydan bir və yaxud iki ildə bir dəfə olunan bir şey deyil. Restoran və digər iaşə obyektlərində təmir zamanı gələndə kiçik bərpa işləri edirlər. O da ki, ciddi dəyişiklik olmamaq şərti ilə. Amma mənzillərdə bu, bir az çətin məsələdir, çünki insanlar evlərə köçür, 5-6 il yaşayırlar və yalnız bundan sonra yenidən təmiri düşünə bilərlər. Hər mövsümün öz dəbi var və buna əsasən evi, onun interyerini qurmağı düzünü desəm, sevmirəm və müştərilərə də məsləhət görmürəm. Bəzən müştərilər deyirlər ki, biz bütün evi dəbə uyğun olaraq qurmaq istəyirik və şirkətimiz də onların istəyini nəzərə alır. Bizim üçün əsas müştərinin işimizdən razılığı və məmnunluğudur.
- Layihə üzərində işin ən çox hansı mərhələsini bəyənirsiniz və hansı səbəbdən?
- Dizayn prosesində, ilk növbədə, ölçülər götürülür, plan yığılır, mebellər yerləşdirilir və sonra dizayna başlanılır. Bu sahədə ən çox bəyəndiyim proses sırf dizaynın özüdür. Mən rənglərlə işləməyi çox sevirəm və bir çox müştəri sırf bu məqamı nəzərə alaraq mənim yanıma gəlir. Dizayn işlərində rənglərlə bağlı olan məsələləri çox sevirəm.
- Müştəriyə güzəştə getmək, yoxsa hər şeyi özünüz bildiyiniz kimi etmək lazımdır?
- Mən həmişə müştəriyə deyirəm ki, siz əgər mənim yanıma gəlirsinizsə mənə güvənməlisiniz. İlk olaraq müştərini dinləyirəm və orada nəyin düzgün, nəyin yanlış olduğunu başa salıram. Bəzən müştərilər dizaynerdən öz istədiklərini tələb edirlər. Bu, tam doğru deyil, amma biz məcbur qalıb razılaşırıq. Müştəri var bizi anlayır, müştəri də var ki, öz bildiyini istəyir. Mən başa salıram və öncədən xəbərdar edirəm ki, interyerdə bu ola bilər yaxşı alınmayacaq. Tutalım çox adam 100 kvadratmetrlik mənzil alır, amma orada 10 dənə otağın olmasını istəyir və deyir ki, bütün otaqlar klassika üslubunda dizayn olunsun. Çox adama məlumdur ki, klassika üslubu evi kiçildir, buna baxmayaraq biz onu düzgün şəkildə etməyə çalışırıq ki, funksionallığını itirməsin. Çox vaxt müştərilər məsləhətlərə qulaq asır. Bu, bizi çox sevindirir.
- İstərdik sonda gələcək planlarınızdan danışasınız. Elə bir layihə varmı onu reallaşdırmaq sizin arzunuzdur?
- Konkret belə layihəni deməyə çətinlik çəkirəm. Hər bir dizayner istəyər ki, gözəl layihələr reallaşdırsın. Təbii ki, evlərdən və villalardan başqa daha çox iaşə obyektlərinin, kafe, restoranlar və otellərin interyer dizayn işləri ilə məşğul olmaqda maraqlıyıq. Çünki bu, bizim şirkətimizin fəaliyyətində daha böyük önəm daşıyır. Tanınmış şəxslərin, dövlət və incəsənət adamlarının villalarının layihələrini icra edirik, amma biri də var ki, otelin və restoranın adlarını çəkirsən və hər kəs tanıyır, bu da bizə daha xoş və qürurverici olur.
Bölmənin digər xəbərləri
