ABŞ Dövlət Departamenti Entoni Blinkenin Çinə planlaşdırılan səfərinin təxirə salındığını təsdiqləyib
Bakı, 4 fevral, AZƏRTAC
ABŞ Dövlət Departamenti hava şarı insidentinə görə dövlət katibi Entoni Blinkenin Çinə planlaşdırılan səfərinin təxirə salındığını təsdiqləyib.
AZƏRTAC xəbər verir ki, bu barədə ABŞ Müdafiə Nazirliyi məlumat yayıb.
Pentaqonun sözçüsü Patrick Rayder brifinqində ölkə ərazisində yüksək hündürlükdə Çinə məxsus kəşfiyyat şarının aşkarlandığını və onu izlədiklərini bildirərək deyib: “Biz ÇXR-in təəssüf hissi duyduqları barədə bəyanatını nəzərə aldıq, lakin bu şarın bizim hava məkanında olması suverenliyin və beynəlxalq hüququn açıq şəkildə pozulmasıdır. Bunun baş verməsi isə qəbuledilməzdir... Departamentdəki tərəfdaşlarla, eləcə də Konqreslə məsləhətləşmələrdən sonra belə qənaətə gəldik ki, hazırda katib Blinkenin Çinə səfəri üçün şərait uyğun deyil”.
O vurğulayıb ki, Birləşmiş Ştatlar bu insidenti müzakirə etmək üçün Çinlə açıq əlaqə kanallarını saxlamaqda davam edəcək.
Rayderin sözlərinə görə, “şar hazırda kommersiya hava səyahəti üçün nəzərdə tutulduğundan əhəmiyyətli dərəcədə yüksək hündürlükdə hərəkət edir və yerdəki insanlar üçün heç bir hərbi və ya fiziki təhlükə yaratmır”. Eyni zamanda, ABŞ Müdafiə Nazirliyi bu topu vurmağı təhlükəli hesab etdiklərini bildirib. Diqqətə çatdırılıb ki, ABŞ səlahiyyətliləri "vacib məlumatların ələ keçirilməsinin qarşısını almaq üçün hava şarının aşkarlanmasından dərhal sonra tədbir görüblər".
Çin Xarici İşlər Nazirliyindən isə bildirilib ki, “şar Çindən gəlib və mülki məqsəd daşıyır, xüsusən də meteoroloji zond tədqiqatlar üçün istifadə olunur. Güclü külək nəticəsində şar idarəetməni itirərək təyin olunmuş kursdan kənara çıxıb”. Çin Xarici İşlər Nazirliyi fövqəladə vəziyyət nəticəsində meteoroloji tədqiqat qurğusunun ABŞ hava məkanına keçməsindən təəssüfləndiyini bildirib.
Bölmənin digər xəbərləri
