SİYASƏT
ABŞ-ın PBS televiziya kanalında Azərbaycan haqqında veriliş yayımlanmışdır VİDEO
Vaşinqton, 20 noyabr (AZƏRTAC). ABŞ-ın PBS (Public Broadcasting Service) televiziya kanalında yayımlanan “Bu, Amerikadır və dünyadır” proqramının noyabrın 17-də efirə getmiş növbəti buraxılışı Azərbaycana həsr olunmuşdur. Proqram ABŞ ilə yanaşı, Kanadada, Avropada, Asiyada, Yaxın Şərqdə və Afrikada yayımlanır.
Azərbaycanın ABŞ-dakı səfiri Elin Süleymanov ilə müsahibənin yer aldığı verilişdə aparıcı Dennis Uoli tərəfindən ölkəmizin mədəniyyəti, tarixi, iqtisadiyyatı, təbiəti, Azərbaycan-ABŞ əlaqələri, Ermənistan-Azərbaycan, Dağlıq Qarabağ münaqişəsi və s. barədə suallar verilmişdir.
E.Süleymanov demişdir ki, Azərbaycanı digər ölkələrdən fərqləndirən əsas cəhətlərdən biri ölkənin Şərq və Qərb, müxtəlif mədəniyyətlər və sivilizasiyalar arasında körpü olması, Avropa ilə Asiyanın qovuğunda yerləşməsi, bu əlverişli mövqeyindən faydalanaraq özündə çoxsaylı mədəni, dini və tarixi irsləri ehtiva etməsidir. Səfir Azərbaycanın müstəqilliyini bərpa etdikdən sonrakı vəziyyəti, ölkənin enerji siyasəti, iqtisadiyyatın sürətli inkişafı haqqında ətraflı danışmışdır.
Dağlıq Qarabağ münaqişəsi ilə bağlı məlumat verən diplomat Azərbaycan ərazilərinin 20 faizinin Ermənistan tərəfindən işğal edildiyini və bir milyondan artıq azərbaycanlının qaçqın və məcburi köçkünə çevrildiyini diqqətə çatdırmışdır. O, regionun gələcək inkişafı üçün sülhün əldə olunmasının vacibliyini qeyd etmiş, Ermənistanın öz gələcəyi barədə qərar verməli olduğunu vurğulamışdır.
ABŞ ilə ikitərəfli əlaqələrdən bəhs edən səfir əməkdaşlığın müxtəlif sahələrindən misallar gətirmişdir. O bildirmişdir ki, özünü etibarlı tərəfdaş kimi təsdiq etmiş Azərbaycan ilə münasibətlər bəzən lazımı qiymətini almır. Diplomat Azərbaycan və ABŞ-ın ümumi demokratik dəyərləri bölüşdüyünü, müsəlman dünyasında ilk demokratik respublika olan Azərbaycanda ABŞ-dan da əvvəl qadınlara səsvermə hüququ verildiyini diqqətə çatdırmışdır.
E.Süleymanov, həmçinin Prezident İlham Əliyevin Azərbaycanın milli maraqlara əsaslanan müstəqil inkişaf xəttinin qorunub saxlanması istiqamətində apardığı siyasətdən, dövlətimizin başçısının “qara qızılın insan kapitalına” çevrilməsi ideyasından danışmışdır. Müsahibə ilə tam şəkildə http://www.thisisamerica.net/videoarchive_2013-2014.html, https://www.youtube.com/watch?v=hykvk1hvQhA&feature=youtu.be linklərindən tanış olmaq mümkündür.
Yusif Babanlı
AZƏRTAC-ın xüsusi müxbiri
Vaşinqton