ABŞ LİVİYAYA QARŞI QADAĞALARI LƏĞV EDİR
Tripoliyə qarşı sanksiyaların götürülməsi elan edildikdən sonra “Panamerikan” aviaşirkəti təyyarəsinin 1988-ci ildə Liviya terrorçuları tərəfindən partladılması nəticəsində həlak olan sərnişinlərin qohumlarına yeni ödənişlərin verilməsinə başlanmalıdır. Əldə edilən razılaşmaya uyğun olaraq, hər bir ailə daha 4 milyon dollar alacaqdır.
Liviya onun terrorizmin sponsorları sayılan dövlətlər siyahısından çıxarılmasını da tələb edir. Bu tələb yerinə yetirilərsə, hər bir ailəyə, əlavə olaraq, 2 milyon dollar ödəniləcəkdir. Beləliklə, hər bir ailəyə kompensasiya ödənişlərinin ümumi məbləği 10 milyon dollar olacaqdır.
Xatırladaq ki, M.Qəzzafi hökuməti ilə ABŞ hökuməti arasında əldə olunmuş sazişlər sayəsində ötən il Liviya ABŞ-ın xahişlərini nəzərə alaraq, bioloji və kimyəvi silah ehtiyatlarını ləğv etmiş, nüvə silahı yaratmaq proqramlarının həyata keçirilməsini dayandırmışdır.
Bundan əlavə, bu ilin iyununda ABŞ 24 illik fasilədən sonra Liviya ilə birbaşa diplomatik münasibətləri bərpa etmiş, ona qarşı iqtisadi qadağalar isə, əslində, aprel ayında götürülmüşdür. Buna səbəb dövlət başçısı Müəmmər Qəzzafinin “Boinq” təyyarəsinin partladılmasına görə məsuliyyət daşıyan terrorçuların tribunala verilməsinə razı olması, sonra isə Liviyanın nüvə proqramını dayandırmasıdır. Üstəlik, o, ABŞ-ın Əfqanıstanda hərbi əməliyyatını dəstəkləmiş, İraqın keçmiş liderlərinə sığınacaq verməkdən imtina etmişdir.
Xatırladaq ki, Liviyaya qarşı qadağalar hələ Prezident R.Reyqanın dövründə tətbiq olunmuşdu.
Bölmənin digər xəbərləri
