ABŞ MƏRKƏZİ KƏŞFİYYAT İDARƏSİNİN ÜÇÜNCÜ REYXLƏ ƏLAQƏLƏRİ
Respublikaçı senator Maykl Divayn arxivin açıqlanmasına həsr edilmiş mətbuat konfransında demişdir: “MKİ-nin məxfisizləşdirilən sənədləri nasistlərin törətdikləri hərbi cinayətlər və müharibədən sonrakı dövrdə hökumətin nasist hərbi caniləri ilə qarşılıqlı münasibətləri barədə olduqca çox yeni və mühüm tarixi informasiyaları üzə çıxarır”.
Bütün sənədlər üç əsas qrupa bölünübdür. Birinci qrupa “Federal Təhqiqat Bürosunun qovluqları” daxildir. Burada Avropada yəhudilərin və digər xalqların nümayəndələrinin kütləvi surətdə qırılmasında iştirak etmiş və sonralar ABŞ-a köçən və Amerika kəşfiyyatı tərəfindən istifadə olunan almanlar barədə sənədlər toplanmışdır. Bu arxivlərdə ABŞ korporasiyalarının Üçüncü reyxi dəstəkləmiş fəaliyyətdən əldə etdikləri mənfəətə işıq salan sənədlər də var.
İkinci qrupda – “MKİ-nin qovluqları”nda ABŞ xüsusi xidmət orqanlarının nasist hərbi canilərindən “soyuq müharibə” illərində SSRİ-yə qarşı işdə istifadə etdikləri barədə sənədlər toplanmışdır. İşçi qrupu dəqiqləşdirmişdir ki, SS (xüsusi təyinatlı qoşun) oberşturmbanfüreri və İmperiya Təhlükəsizlik İdarəsinin “Yəhudi şöbəsi”nin rəhbəri Adolf Eyxman İkinci dünya müharibəsindən sonra MKİ-yə işləmişdir.
Məlum olmuşdur ki, Amerika kəşfiyyatının məşhur hərbi cani Adolf Eyxmanı tutmaq üçün hər cür imkanı vardı. Sənəddə deyilir: “Alınan xəbərlərə görə, Eyxman 1952-ci ildən Argentinada “Klemens” təxəllüsü ilə yaşamışdır”. MKİ bu informasiyanı üzə çıxarmamağı qərara almışdı, çünki ehtiyatlanırdı ki, Eyxman Almaniya kansleri Konrad Adenauerin Katibliyinin başçısı və ən yaxın köməkçisi Hans Qlobkenin nasist keçmişi barədə məlumatı açıqlaya bilər. Qlobke yəhudi millətindən olan alman vətəndaşlarını ayrıca qruplara (onlar üçün heç bir qanunun qüvvəsi yox idi) bölən sistemin hazırlanması ilə məşğul olurdu.
Beləliklə, MKİ gestapo (gizli dövlət polisi) əməkdaşı, milyonlarla yəhudinin məhvinə bilavasitə cavabdeh olan Adolf Eyxmana cəzadan canını qurtarmaqda kömək etmişdi. Lakin 1960-cı il mayın 13-də İsrail agentləri onu Buenos-Ayresdə tutaraq, gizlicə İsrailə aparmışdılar. Məhkəmə Eyxmanı ölüm cəzasına məhkum etmiş və 1962-ci il iyunun 1-də onu Ramla şəhərinin həbsxanasında dar ağacından asmışdılar. Onun cənazəsi yandırılmış və külü sahildən uzaqda dənizə atılmışdı.
“Gelen Təşkilatı” haqqında “qovluqlar”da müharibədən sonrakı Almaniyanın xüsusi xidmət orqanı barədə sənədlər toplanmışdır. ABŞ-dan milyonlarla dollar almış olan bu orqana Vermaxtın Şərq cəbhəsindəki hərbi kəşfiyyatının baş nümayəndəsi Reynhardt Gelen rəhbərlik edirdi.
Bəşəriyyətə qarşı faciələr törətmiş canilər ədalətli cəzadan yalnız ona görə can qurtara bildilər ki, müharibədən sonra Şərq də, Qərb də tez bir zamanda bir-birinə qarşı mübarizəyə başladı və hər ikisi də nasistləri izləmək niyyətindən vaz keçdi.
O ki qaldı Hitlerə, dərc edilən sənədlər onun barəsində heç bir yeni məlumat vermir. Doğrudur, yalnız bir alman cərrahın 1937-ci il tarixli məktubu maraq doğura bilər. O yazırdı: “Hitler dünyanın heç zaman görmədiyi ən ağılsız cinayətkar kimi öz həyatına son qoyacaqdır”.
1945-ci ilin fevralında Yalta konfransında Franklin Ruzvelt, Uinston Çörçill və İosif Stalin hərbi canilərin qarşılıqlı surətdə təhvil verilməsi barədə razılığa gəlmişdilər. Bu, xüsusən antisovet hərəkatının fəallarına aid idi. Lakin bir il sonra ABŞ-ın Fulton şəhərində Çörçill böyük dövlətlərin əməkdaşlığının dayandırıldığını bəyan etdi.
Bununla da, “soyuq müharibə” başlandı.
Bölmənin digər xəbərləri
