ABŞ ŞİRKƏTİ TENDERİN QALİBİ OLMUŞDUR
Paket ödənişləri üzrə Avtomatlaşdırılmış Klirinq Sisteminin (AKS) yaradılması ilə əlaqədar 2001-ci ildə Dünya Bankının prosedur qaydalarına uyğun olaraq Milli Bankda Tender keçirilmişdir. 2002-ci ilin yanvar ayında ABŞ-ın “Hewlett Packard” şirkəti tenderin qalibi elan olunmuş və tenderin nəticəsi Dünya Bankı tərəfindən bəyənilmişdir.
Martın 28-də Azərbaycan Respublikası Milli Bankı ilə ABŞ-ın “Hewlett Packard” şirkəti arasında Paket ödənişləri üzrə Avtomatlaşdırılmış Klirinq Sisteminin (AKS) yaradılması üzrə müqavilə imzalanmışdır. Sənədi Milli Bankın İdarə Heyəti Sədrinin birinci müavini Alim Quliyev və ABŞ-ın “Hewlett Packard” şirkəti Avropa Bölməsinin Baş Direktoru Hilmar Lorenz imzalamışlar. Müqaviləyə əsasən “Hewlett Packard” şirkəti ilə birlikdə bu layihənin həyata keçirilməsində İsveçin “CMA” - proqram təminatı şirkəti də iştirak edəcəkdir. Layihənin reallaşması üçün Milli Bankda işçi qrupu yaradılmışdır.
Müqaviləyə əsasən paket ödənişləri üzrə Avtomatlaşdırılmış Klirinq Sisteminin cari ilin noyabr ayının sonuna kimi yaradılıb istifadəyə verilməsi nəzərdə tutulmuşdur.
Bölmənin digər xəbərləri
