ABŞ Ticarət Məhkəməsi Donald Trampa idxal rüsumlarının tətbiqini qadağan edib
Bakı, 29 may, AZƏRTAC
ABŞ Beynəlxalq Ticarət Məhkəməsi Prezident Donald Trampın fövqəladə hallar qanunu çərçivəsində geniş idxal rüsumlarının tətbiqini qadağan edib.
AZƏRTAC xəbər verir ki, müvafiq qərar Donald Trampın geniş idxal rüsumlarının tətbiqi ilə bağlı səlahiyyətlərini aşması barədə bir sıra məhkəmə proseslərindən sonra verilib.
Üç hakimdən ibarət kollegiya Kanada, Meksika və Çindən idxal olunan mallara fentanil tariflərin, eləcə də dünya ölkələrindən gətirilən məhsullara rüsumların tətbiqi ilə bağlı aprelin 2-də elan edilmiş administrativ göstərişlərin birdəfəlik ləğvi barədə qərar qəbul edib.
“Dünya miqyasında cavab tarifləri barədə göstərişlər idxalın tariflər vasitəsilə tənzimlənməsi üçün Beynəlxalq Fövqəladə İqtisadi Səlahiyyətlər barədə Qanunun (IEEPA) prezidentə verdiyi bütün səlahiyyətləri üstələyir. Qaçaqmalçılığa cavab olaraq tətbiq edilən tariflər sərəncamlarda qeyd olunan təhdidləri aradan qaldırmadığı üçün işləmir”, - deyə qərarda bildirilir.
“Seçilməmiş hakimlər ölkədə fövqəladə vəziyyətlərə hansı reaksiyanın düzgünlüyü barədə qərarı verməməlidir. Prezident Donald Tramp ABŞ-ı ilk yerə çıxarmağı vəd edib. Ağ ev böhranın həlli və ölkənin əzəmətini geri qaytarmaq üçün icra hakimiyyətinin bütün qollarından istifadə etmək niyyətindədir”, - deyə Donald Tramp administrasiyasının nümayəndəsi Kuş Desay vurğulayıb.
Bölmənin digər xəbərləri
