Adil Əliyev: Prezidentin Brüssel qələbəsi Minsk qrupunu yenidən fəallaşdırmaq cəhdlərini puç etdi
Bakı, 9 aprel, AZƏRTAC
Prezident İlham Əliyevin aprelin 6-da Brüsselə səfəri zamanı Avropa İttifaqı Şurasının Prezidenti Şarl Mişelin vasitəçiliyi ilə Ermənistanın baş naziri Nikol Paşinyanla görüşü və apardığı danışıqlar bir sıra mühüm nəticələrlə əlamətdar olub. Bunlardan biri ATƏT-in Minsk qrupunun lazımsız təsisat kimi artıq keçmişdə qaldığının bir daha qabarıq şəkildə özünü büruzə verməsi idi.
AZƏRTAC xəbər verir ki, bu fikirləri Milli Məclis sədrinin müavini Adil Əliyev deyib.
O qeyd edib ki, artıq Ermənistan və Azərbaycan arasında danışıqlar Vətən müharibəsinin yaratdığı yeni geosiyasi reallığın tərkib hissəsi olaraq ATƏT-in Minsk qrupu çərçivəsində aparılmır. Danışıqlar Vətən müharibəsindən bəri Rusiyanın vasitəçiliyi ilə aparılmış və üçtərəfli bəyannamələr imzalanmışdır. Daha sonra isə 2021-ci il dekabrın 14-də Azərbaycan və Ermənistan liderlərinin Brüsseldə Avropa İttifaqının vasitəçiliyi ilə ilk görüşü keçirilib. Həmin görüşdən etibarən tərəflər arasında Avropa İttifaqının vasitəçiliyi ilə sülh gündəliyinin formalaşdırılması məqsədilə sıx təmaslar qurulub, telefon danışıqları keçirilib. Beləliklə, ATƏT-in Minsk qrupu iflic vəziyyətdə qalıb.
Bu fonda Avropa İttifaqı səylərini artıraraq fəallıq göstərməyə başlayıb. Avropa İttifaqının vasitəçı kimi fəallaşması və ATƏT-in Minsk qrupunun sıradan çıxması bir sıra səbəblərdən Azərbaycanın maraqlarına uyğundur. Belə ki, Brüssel Ermənistan və Azərbaycan arasında sülh danışıqlarında hansısa bir qurum və ya dövlətin inhisarçı mövqe tutmasının qarşısını alaraq alternativ və ya tamamlayıcı bir platforma kimi çıxış edir. Digər tərəfdən isə postmüharibə dövründə Ermənistan və Azərbaycan arasında münasibətlərə müharibə deyil, sülh diskursunu gətirir. Bu, Vətən müharibəsinin nəticələrinin beynəlxalq hüquqi müstəvidə möhkəmləndirilməsi, ölkədə və regionumuzda təhlükəsizlik və tərəqqi üçün önəmlidir.
Milli Məclis sədrinin müavini deyib ki, Prezident İlham Əliyevin rəhbərliyi ilə Azərbaycan dövlətinin yürütdüyü xarici siyasət və diplomatiyanın Brüssel görüşü zamanı təsdiqlənən əsas nailiyyətlərindən biri ATƏT-in özünün və onun Minsk qrupunun həmsədrlərinin bu təsisatın sonunun çatmasını birbaşa və ya dolayı yolla etiraf etməsidir. ATƏT-in sədarəti Azərbaycan və Ermənistan liderlərinin Avropa İttifaqı Şurasının Prezidenti Şarl Mişelin təşəbbüsü ilə görüşünü və mümkün sülh sazişi istiqamətində prosesin başlanmasını alqışlayaraq Cənubi Qafqazda sabit və dinc mühitin təmin edilməsi üçün bütün səylərdə “kömək etməyə” hazır olduğunu bildirib. Beləliklə, ATƏT Minsk qrupunun prosesdən faktiki olaraq kənarda qalmasını və bununla barışdığını etiraf edir, köməkçi rol oynamağa hazır olduğunu ifadə edir.
“Rusiya xarici işlər naziri Sergey Lavrov mətbuat konfransı zamanı digər həmsədrlər ABŞ və Fransanın bu formatda Moskva ilə əlaqə saxlamaqdan imtina etdiklərini və bununla da Minsk qrupunu ləğv etdiklərini bildirib. Lavrovun dediklərini ABŞ-ın davranışı da təsdiq edir. Belə ki, ABŞ-ın dövlət katibi Entoni Blinken şəxsən Brüssel səfəri ərəfəsində Ermənistan və Azərbaycan liderləri ilə telefon danışıqları həyata keçirib. Ağ evin telefon danışığı ilə bağlı yaydığı bəyanatda bir məqam xüsusən diqqətçəkəndir. Blinken Paşinyana qəti və aydın surətdə xəbərdarlıq edib ki, “indi regionda yenidən münaqişə alovlandırmaq vaxtı deyil”. Fransaya gəldikdə isə, onun Avropa İttifaqı vasitəsilə danışıqlarda hansısa təsir imkanları qazanmasına cəhd etməsi Parisin də ATƏT-in Minsk qrupunun sonunun çatması ilə barışdığının əlamətidir. Amma istənilən halda bu məsələdə Fransa və Ermənistan uduzan, Azərbaycan isə udan tərəfdir. Çünki Azərbaycan Avropa İttifaqının 27 üzv dövlətinin üçdə biri ilə strateji tərəfdaşlıq haqqında sazişlər imzalayıb. Təşkilatın əksər üzvləri, o cümlədən İtaliya, Almaniya, Macarıstan, İspaniya, Polşa kimi əhəmiyyətli ölkələr Azərbaycanla xoş münasibətlərdədir və ölkəmizin haqlı mövqeyini dəstəkləyirlər.
Qeyd edilənlər əsasında iki nəticəyə gəlmək olur: birincisi, Prezident İlham Əliyevin Brüssel səfəri göstərdi ki, Azərbaycan ATƏT-in Minsk qrupunun lazımsız təsisat kimi prosesdən faktiki olaraq uzaqlaşdırılmasına nail olub. İkincisi, Prezident İlham Əliyevin uzaqgörən diplomatiyası nəticəsində Azərbaycan həmin qurumun fəaliyyətinin iflic vəziyyətinə düşəcəyi və ya ümumiyyətlə, ləğv olunacağı hala uzun müddətdən bəri yaxşı və düşünülmüş şəkildə hazırlaşıb. Buna görə də Brüssel səfəri zamanı qazanılmış nəticələr Prezident İlham Əliyevin diplomatik qələbəsidir, milli maraqlarımıza xidmət edən və davamlı sülhə doğru bir addımdır”, - deyə Adil Əliyev vurğulayıb.
Bölmənin digər xəbərləri
