Afinada səhiyyə işçiləri etiraz ediblər
Afina, 16 noyabr, AZƏRTAC
Yunanıstanda tibb işçiləri xəstəxanalarda əməkhaqlarının az olması və kadr çatışmazlığına qarşı etiraz ediblər. Etirazçılar tibb işçilərini imtiyazları olan təhlükəli peşələr siyahısına daxil etməyi tələb edirlər. Nümayişçilər deyiblər ki, Yunanıstan hökumətinin peyvənd olunmamış tibb işçilərini işdən azad etmək qərarı səhiyyədə işçi qüvvəsi çatışmazlığını artırıb.
Qeyd edək ki, iyul ayında Yunanıstan qocalar evində çalışanlar üçün, sentyabrda isə tibb işçiləri üçün məcburi peyvənd olunmağı tətbiq edib. Keçən həftə ölkədə yeni tədbirlər, məhdudiyyətlər elan edilib. Peyvənd olunmamış vətəndaşlar kafe və ya restoranın, dövlət qurumlarının və bankların girişində mənfi koronavirus testi təqdim etməlidirlər. Dövlət və özəl sektor işçiləri də işə başlamaq üçün həftədə iki dəfə testlərdən keçməlidirlər. Əhalinin yalnız 60 faizinin COVID-19-a qarşı peyvənd olunduğu Yunanıstanda hökumət icbari peyvəndlər və testlər də daxil olmaqla əlavə məhdudiyyətlər tətbiq etməyi düşünür.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
