DÜNYA
Afrika ölkələri liderlərinin virtual sammitində pandemiya ilə mübarizə müzakirə olunub
Qahirə, 12 iyun, AZƏRTAC
COVID-19 pandemiyası ilə mübarizə və onun iqtisadi-sosial fəsadlarının aradan qaldırılması məsələləri iyunun 11-də keçirilən Afrika ölkələri liderlərinin virtual sammitində müzakirə edilib.
AZƏRTAC xəbər verir ki, sammitdə hazırda Afrika İttifaqına sədrlik edən Cənubi Afrika Prezidenti Siril Ramafoza, Misir Prezidenti
Əbdülfəttah əl-Sisi, habelə Keniya, Mali, Konqo Demokratik Respublikası, Qabon, Niger, Tanzaniya, Ruanda, Çad, Madaqaskar prezidentləri və Sudanın Baş Naziri çıxış edib.
Misir Prezidenti Afrika ölkələrini pandemiya ilə mübarizədə daha sıx əməkdaşlığa çağırıb. O qeyd edib ki, Qahirə ağır vəziyyətdə olan dövlətlərə humanitar yardım göstərməyə hazırdır. Sisi əlavə edib ki, pandemiya dövründə Afrikada terrorizm və ekstremizmə qarşı mübarizə də davam etməlidir.
Afrika ölkələrinin liderləri aclığa qarşı mübarizə, ərzaq təhlükəsizliyinin təmin edilməsi, qitədə infrastruktur layihələrinin həyata keçirilməsi məsələləri ətrafında da fikir mübadiləsi aparıblar.
Qeyd edək ki, son rəsmi məlumata görə, Afrikada koronavirusa 218 mindən çox insan yoluxub, onlardan 5800 nəfərə yaxını vəfat edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
