Ağayar Axundzadə: Gənc cüdoçular arasında Azərbaycan birinciliyi yüksək səviyyədə təşkil olunub
Bakı, 28 fevral, Leyla Qurbanova, AZƏRTAC
Gənc cüdoçular arasında Azərbaycan birinciliyi yüksək səviyyədə təşkil olunub. Turnirdə gənc cüdoçuların potensiallarını nümayiş etdirmələri üçün hər cür şərait yaradılıb. Birincilikdə 51 klubdan 280-dək cüdoçu iştirak edir. Böyüklərdən ibarət yığma komanda üçün əsas ehtiyat qüvvə olan gənclər yığmasını formalaşdıracaq bu yarış böyük əhəmiyyət daşıyır. Bu turnir həm də Avropa və dünya birinciliklərinə seçmə xarakter daşıması baxımından önəmlidir. İdmançılar medallar uğrunda gərgin mübarizə aparırlar.
Bu sözləri Bakı İdman Sarayında keçirilən gənclər arasında Azərbaycan birinciliyinin təşkilat komitəsinin rəhbəri Ağayar Axundzadə AZƏRTAC-a məxsusi müsahibəsində bildirib.
Azərbaycan birinciliyində Bakı ilə yanaşı, regionlardan da idmançıların böyük fəallıq göstərdiklərini deyən mütəxəssis idmanın bu növünün ölkəmizdə, xüsusilə bölgələrdə inkişafını xüsusi qeyd edib. O bildirib ki, Azərbaycan Cüdo Federasiyası bölgələrdə də idmanın bu növünün inkişafı üçün bir sıra tədbirlər həyata keçirir. Rayon və zona yarışlarının təşkili, seminar və təlim-məşq toplanışlarının keçirilməsi cüdonun kütləviliyinin təmin edilməsi üçün əlverişli şərait yaradır.
Bölmənin digər xəbərləri
