AĞCABƏDİDƏ TƏLƏBƏLƏRLƏ GÖRÜŞ KEÇİRİLMİŞDİR
AZƏRTAC xəbər verir ki, Ağcabədi Rayon İcra Hakimiyyətində ölkənin ali məktəblərinə bu il keçirilən imtahanlarda tələbə adını qazanmış gənclərlə görüş keçirilmişdir.
Görüşdən əvvəl tələbələr ulu öndər Heydər Əliyevin şəhərin mərkəzi meydanındakı abidəsi önünə tər çiçəklər düzmüş, xatirəsini ehtiramla yad etmişlər.
Görüşdə çıxış edən rayon təhsil şöbəsinin müdiri Mehdi Əhmədov Ağcabədidə təhsilin inkişafına dövlət qayğısından, yeni məktəblərin tikilməsi və əsaslı təmiri, maddi-texniki bazasının möhkəmləndirilməsi sahəsində görülən işlərdən danışmışdır. Bildirmişdir ki, bu il 89 nəfər ağcabədili məzun ali məktəblərə daxil olmuş, onların 12 nəfəri 500-dən artıq bal toplamışdır.
Görüşdə çıxış edən tələbələr müəllim və valideynlərinin etimadını doğruldacaqlarını bildirmişlər.
Ağcabədi Rayon İcra Hakimiyyətinin başçısı Şahin Məmmədov tələbələri təbrik etmiş, onlara yüksək bilikli mütəxəssis kimi yetişmək üçün yaxşı oxumağı və Vətənə ləyaqətlə xidmət göstərməyi tövsiyə etmişdir.
Görüşün sonunda yüksək bal toplamış tələbələrə rayon icra hakimiyyətinin fəxri fərmanı və qiymətli hədiyyələr verilmişdir.
Bölmənin digər xəbərləri
