AĞDAM RAYON İCRA HAKİMİYYƏTİNİN BAŞÇISI HƏSƏN SARIYEVİN ÇIXIŞI
-Möhtərəm cənab Prezident!
Rayonumuzun ərazisinin çox hissəsi işğal altında olsa da, Ağdam Sizin qayğınız, diqqətiniz sayəsində, rəhbərliyiniz altında yaşayır, sürətlə inkişaf edir, abadlaşır və öz əvvəlki mətanətini qoruyur. Ağdamlılar torpaqlarını yağı düşməndən azad etmək üçün hər an Ali Baş Komandanın əmrini gözləyirlər.
Sizin 2003-cü ildə prezident seçkiləri ərəfəsində ağdamlı məcburi köçkünlərlə görüşünüzdən sonra tapşırıq və göstərişinizə əsasən onların sosial problemlərinin həlli, mənzil-məişət şəraitlərinin, güzəranının yaxşılaşdırılması üçün bütün lazımi tədbirlər həyata keçirilir. Səfərinizdən sonra tapşırığınıza əsasən rayon ərazisində 20 min 500 nəfərin yaşadığı 3858 evdən ibarət müasir tipli 12 yeni qəsəbə salınaraq çadırlarda ən ağır şəraitdə yaşayan məcburi köçkünlərin istifadəsinə verilmişdir. Həmin qəsəbələrdə 14 orta məktəb binası, 3 musiqi məktəbi, 5 uşaq bağçası, 9 səhiyyə obyekti, 6 poçt şöbəsi, 8 klub-icma mərkəzi, 10 inzibati bina, 3 baytar məntəqəsi, 1 yanğından mühafizəsi postu tikilmişdir. Çullu, Quzanlı, Bənövşəli, Eyvazlı və Ayaqqərvənd kəndlərində orta məktəblər, Quzanlı qəsəbəsində Musiqi Texnikumu üçün binalar inşa edilmişdir. Əhali üçün çox vacib olan Ergi ərazisinə gedən yolda Qərvənd çayı üzərində körpü salınmış, 30 subartezian quyusu istifadəyə verilmişdir. Rayonun enerji təchizatını yaxşılaşdırmaq məqsədi ilə hər biri 16 meqavat gücündə 2 yardımçı elektrik stansiyası quraşdırılmışdır.
2006-cı ilin mart ayında Ağdam rayonuna Sizin tarixi səfərinizdən sonra diqqət və qayğınızın nəticəsində Quzanlıya qəsəbə statusu verilmişdir. Burada abadlıq işləri aparmaq üçün 500 min manat vəsait ayırmısınız. Artıq yeni qəsəbədə tikinti işlərinin həyata keçirilməsi üçün 250 min manat vəsait ödənmiş, əhalinin sevincinə səbəb olan işlər başlanmışdır. Sizin diqqət və qayğımız sayəsində Quzanlı qısa vaxtda abad, gözəl bir şəhərə çevriləcəkdir.
Təməli Sizin tərəfinizdən qoyulmuş Olimpiya İdman Kompleksində hazırda tamamlama işləri gedir. Cənab Prezident, bütün bunlara görə Ağdam camaatı Sizə sonsuz minnətdarlığını bildirir.
Cənab Prezident, böyük qürur və minnətdarlıq hissi ilə məlumat vermək istəyirəm ki, Sizin yaxından köməyiniz və qayğınız nəticəsində regionların sosial-iqtisadi inkişafı Dövlət Proqramında Ağdam rayonu üzrə nəzərdə tutulmuş 14 tədbirin hamısı yerinə yetirilmiş və ya icrası başa çatmaq üzrədir. Ermənistan tərəfindən atəşkəs rejiminin hər gün dəfələrlə pozulmasına baxmayaraq, düşmənlə üz-üzə dayanan ağdamlılar Sizə güvənir, heç bir qorxu hiss etmədən yaşayır, qurub yaradırlar. 8-10 il əvvəl Ağdamın işğal olunmamış ərazisində 14-15 min nəfər əhali yaşayırdısa, hazırda onların sayı 85 min nəfərdən çoxdur. Bütün bunlar onu göstərir ki, aparılan uğurlu siyasətə, ulu öndərimiz Heydər Əliyevin uzaqgörən daxili və xarici siyasətinin layiqli davamçısı möhtərəm Prezidentimizə əhalimizin sonsuz inamı vardır.
Cənab Prezident, “Dördyol” adlanan ərazidə yol kənarında çadır və çiy kərpic daxmalarda məskunlaşmış 932 ailədə onlar üçün yeni evlərin tikilməsi barədə göstəriş verməyinizə inanır və ümid bəsləyirlər. Rayonda əkin sahələrinin suvarılmasında vaxtilə istifadə olunan su mənbələrinin işğal altında olduğunu nəzərə alaraq, suvarma üçün 50 və içməli su üçün 30 subartezian quyusunun qazılmasına kömək göstərməyinizi xahiş edərdik.
Möhtərəm cənab Prezident, ağdamlılar ölkəmizdə apardığınız çox nəhəng, əzəmətli quruculuq işləri ilə fəxr edir, qürur hissi keçirir, qarşıda duran vəzifələrin uğurla həyata keçirilməsində bundan sonra da Sizin ən yaxın köməkçiləriniz olacaqlar.
Diqqətinizə görə minnətdaram.
Bölmənin digər xəbərləri
