Aİ Serbiya və Kosovonun avtomobil nömrələrini qarşılıqlı tanımasını alqışlayıb
Belqrad, 8 yanvar, AZƏRTAC
Avropa İttifaqı (Aİ) Serbiya və Kosovonun bir-birinin avtomobil nömrə nişanlarını qarşılıqlı olaraq tanımasını alqışlayıb.
AZƏRTAC xəbər verir ki, Aİ-nin xarici və təhlükəsizlik məsələləri üzrə ali nümayəndəsi Cozef Borelin ofisinin yaydığı məlumata görə, Serbiya və Kosovonun nəqliyyat vasitələrinin nömrələrini rəsmən tanıması və stiker rejimini tamamilə ləğv etməsi qərarlarının müsbət qarşılandığı bildirilib. Bunun iki ölkə arasında vaxtilə əldə edilmiş razılaşmaların həyata keçirilməsində, dialoq çərçivəsində münasibətlərin normallaşması istiqamətində irəliləyişdə müsbət addım olduğu qeyd edilib. Həmçinin bu qərarların Aİ və Qərbi Balkan ölkələrinin regional inteqrasiyası baxımından düzgün istiqamətdə qəbul edildiyi vurğulanıb.
Xatırladaq ki, Serbiya yanvarın 1-dən etibarən Kosovo nömrəli nəqliyyat vasitələrinin ölkədə sərbəst hərəkətinə icazə verib. Kosovo isə yanvarın 4-də oxşar praktikanı tətbiq etmək qərarına gəlib.
2021-ci ildən indiyədək iki ölkə vətəndaşları sərhədi keçərkən nəqliyyat vasitələrinin nömrə nişanlarının üzərindəki dövlət rəmzlərinin üzərini stikerlə örtürdülər.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
