Aleksandar Vuçiç: Serbiya Kosovo ilə gərginliyin azaldılmasının tərəfdarıdır
Belqrad, 15 noyabr, AZƏRTAC
Serbiya Kosovo ilə mövcud gərginliyin azaldılmasının tərəfdarıdır.
AZƏRTAC xəbər verir ki, bunu Serbiya Prezidenti Aleksandar Vuçiç Avropa İttifaqının Belqrad-Priştina dialoqu üzrə xüsusi nümayəndəsi Miroslav Layçak ilə görüşdə deyib.
Ölkəsinin dialoq tərəfdarı olduğunu bildirən A.Vuçiç Kosovonun şimalında məskunlaşan serblərin təhlükəsizliyi üçün gərginliyin azaldılmasını istədiklərini qeyd edib.
Serbiya Prezidenti, həmçinin regionda sülhün və sabitliyin qorunmasının vacibliyini vurğulayıb. Kosovoda daha çox serblərin yaşadığı bələdiyyələrdə Serb Bələdiyyələr Birliyinin yaradılmasının ölkəsinin prioritetləri sırasında olduğunu ifadə edib.
Qeyd edək ki, son dövrlərdə Belqrad və Priştina arasında gərginlik artıb. Hazırda tərəflər ABŞ və Aİ tərəfindən dəstəklənən və Fransa-Almaniya Planı kimi tanınan konsepsiya üzrə danışıqlar aparır.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
