Alimlər Leonardo da Vinçinin genetik kodunun sirlərini açıb
Bakı, 22 may, AZƏRTAC
Artıq beş əsrdən çoxdur ki, Leonardo da Vinçi qeyri-adi istedadı və yenilikçi təcrübələri ilə tanınan rəssam, alim və ixtiraçı kimi qeyd olunur. Bu gün “Leonardo DNA Project” layihəsinin beynəlxalq əməkdaşlığı İntibah dövrünün ən böyük dahisinin bioloji sirlərini açmağa həmişəkindən daha yaxındır.
AZƏRTAC xarici mediaya istinadla xəbər verir ki, Leonardo da Vinçi İrsi Assosiasiyasının ekspertləri Alessandro Vezzosi və Anyeze Sabato “Angelo Pontecorboli Editore” tərəfindən nəşr olunan “Genìa Da Vinci. Genealogy and Genetics in Search of Leonardo DNA” kitabında Leonardo da Vinçi İrsi Assosiasiyasının 30 illiyi münasibətilə aparılan tədqiqatların nəticələrini təqdim ediblər. Vinçi bələdiyyəsinin dəstəyi ilə nəşr olunan kitabda 21 nəsli və 400-dən çox insanı əhatə edən 1331-ci ilə aid müfəssəl ailə şəcərəsi var. Bu tədqiqat indiyə qədər aparılan ən qabaqcıl tarixi genetik araşdırmalardan birinin əsasını qoyur və Leonardonun genetik profilinin yenidən qurulmasını ehtiva edir.
Kitabda dərc olunan mənbələrin və arxiv sənədlərinin diqqətlə təhlili nəticəsində Vezzosi və Sabato Leonardonun mənsub olduğu ailənin “budaqlarını” yenidən uğurla qurublar, o cümlədən həm dahi şəxsiyyətin atası, həm də onun ögey qardaşı Domeniko Benedetto ilə bağlı 15-ci nəsil şəcərəsini müəyyən ediblər.
Müəlliflər, həmçinin Vinçidəki Santa-Kroçe kilsəsində da Vinçi ailəsinin məzarının olduğunu təsdiqləyiblər və hazırda Florensiya Universiteti ilə birgə arxeoloji qazıntılar aparılır. Burada Leonardonun babası Antonio, dayısı Françesko və bir neçə ögey qardaşı - Antonio, Pandolfo və Covanni dəfn oluna bilərdi.
Tədqiqatçılar Leonardonun dühasının genetik mənşəyini, onun kəskin görmə qabiliyyətini və yaradıcılıq istedadını izləməyə, habelə dahi şəxsiyyətin sağlamlığına, ölümünə təsir edən genetik amilləri müəyyən etməyə çalışırlar.
Alimlər Leonardonun şəcərəsi ilə bağlı mifləri də təkzib ediblər. Onların dediyinə görə, onun anası Katerina çox güman ki, florensiyalı bankir Vanni di Nikkolo ailəsində kölə, atası isə gənc notarius olub. Genealoji təhlillər göstərir ki, onun babası Antonio təkcə kənd təsərrüfatı ilə deyil, həm də İspaniya ilə Şimali Afrika arasında səyahət edən gəmilərin beynəlxalq ticarəti ilə məşğul olub.
Layihənin əlaqələndiricisi Cessi Ausubel qeyd edib: “XXI əsr həmişəlik itirilən biliklər və yeni kəşflər arasında sərhədləri aradan qaldırır. İstisna etmirik ki, tezliklə Leonardonu tamamilə yeni, bioloji perspektivdən tanıya biləcəyik”.
Bölmənin digər xəbərləri
