ALİMLƏR PARKİNSON XƏSTƏLİYİNİN GENİNİ AŞKAR ETMİŞLƏR
Əvvəllər hesab edilirdi ki, genetik mutasiya xəstəliyin inkişafında əhəmiyyətli rol oynamır.
Albert Eynşteyn adına Nyu-York Tibb Kollecinin alimləri Parkinson xəstəliyindən əziyyət çəkən Aşkenazi yəhudilərindən götürülmüş DNT nümunələrini və sağlam Aşkenazi yəhdilərinin DNT nümunələrini testdən keçirmişlər. Genetik mutasiya Parkinson xəstəliyi olanların 18 faizində və sağlam adamların cəmi 1 faizində aşkara çıxarılmışdır.
Fransa alimləri də bu cür tədqiqat aparmış və eyni genetik anomaliyanı Parkinsona düçar olan Şimali afrikalı və ərəb xəstələrin 40 faizində tapmışlar.
ABŞ-da aparılmış tədqiqatın rəhbəri Süzan Bressman bildirmişdir ki, ilin sonunadək xüsusi test hazırlanacaq və o, Parkinson xəstəliyinə irsi meyli müəyyənləşdirməyə imkan verəcəkdir. Onun fikrincə, mutant geni daşıyıcısı olan adamların təxminən 30 faizi sonra Parkinson xəstəliyindən əziyyət çəkəcəkdir.
Parkinson xəstəliyi mərkəzi sinir sisteminin xroniki inkişaf edən degenerativ xəstəliyidir. Hipokineziya (hərəkətlərin zəifləməsi və sayının azalması, mimikanın və jestlərlə danışmanın məhdudlaşması), rigidlik (əzələ tonusunun yüksəlməsi) və tremor (əsməcə) bu xəstəlik üçün səciyyəvi hallardır.
Təkcə ABŞ-da təxminən yarım milyon insan Parkinson xəstəliyindən əziyyət çəkir.
Bölmənin digər xəbərləri
