ALMANİYA BUNDESTAQI NASİZM QURBANLARININ XATİRƏSİNİ YAD ETMİŞDİR
AZƏRTAC-ın xüsusi müxbiri xəbər verir ki, Almaniya Bundestaqı yanvarın 27-də Birinci Beynəlxalq Holokos xatirə günü münasibətilə anma mərasimi keçirmişdir.
Mərasimdə Bundestaqın üzvləri, Almaniya ictimaiyyətinin, yəhudi icmasının nümayəndələri, Osvensim, Buxenvald və digər nasist ölüm düşərgələrindən təsadüf nəticəsində sağ çıxan keçmiş məhbuslar iştirak etmişlər.
Bundestaqın sədri Lammert faşistlərin ölüm düşərgələrində törətdiyi məşəqqətli faciələrin dünyaya, bəşəriyyətə, insanlığa qarşı yönəldilmiş misli görünməmiş cinayət olduğunu vurğulamış, bunların hamısını ümumilikdə Almaniya tarixinə əbədi yazılmış “biabırçı ləkə” adlandırmışdır.
Birinci Beynəlxalq Holokos xatirə gününün əsas məruzəçisi, Buxenvald və Osvensim ölüm düşərgələrinin dəhşətlərindən sağ çıxmış və hazırda ömrünün 92-ci ilini yaşayan publisist Ernst Kramer İkinci Dünya müharibəsi zamanı 6 milyona qədər yəhudinin irqi ayrı-seçkilik siyasətinin qurbanı olduğunu söyləmişdir.
Anma mərasimində, həmçinin Avropa ölkələrində, o cümlədən Almaniya şəhərlərində təşkilatlanmış neofaşist gənclərin yəhudi məbədləri və qəbiristanlıqlarının təhqir edilməsinə yönəldilmiş vandalizm hərəkətlərinə qarşı etiraz ifadə olunmuşdur.
Bölmənin digər xəbərləri
