ALMANİYA FEDERAL ALİ MƏHKƏMƏSİ KÜRD İŞÇİPARTİYASI ALMANİYADAKI ÖZƏK TƏŞKİLATINI “CİNAYƏTKAR QRUPLAŞMALAR” SİYAHISINDA SAXLAMIŞDIR

22.10.2004 [18:46]
Çap et
A⁺ A^-

Məlum olduğu kimi, Almaniya Federal Ali Məhkəməsi bir neçə il bundan öncə Kürd İşçi Partiyasının (PKK) Almaniyadakı özək təşkilatının radikal təməlçilik, beynəlxalq terrorizm, separatizm və təcavüzkar millətçilik əməllərinə görə fəaliyyətinin dayandırılması və adının “cinayətkar qruplaşmalar” siyahısına salınması barədə qərar çıxarmışdı.

AZƏRTAC-ın xüsusi müxbiri xəbər verir ki, PKK-nın Almaniyadakı özək təşkilatının funksionerləri Federal Ali Məhkəmədən məsələyə yenidən baxmağı, əvvəlki hökmün ləğvinə xitam verilməsini tələb etmişlər. Funksionerlər şikayətlərində təkidlə bildirmişlər ki, guya PKK-nın Almaniyadakı özək təşkilatı 1999-cu ildə PKK lideri Abdullah Öcalanın həbs olunmasından sonra “kürd probleminin həllində” zorakılıq metodlarından əl çəkmiş yeni dinc, sülhməramlı siyasi mübarizə yolu tutmuşdur.

Məsələnin təkrar təhqiqatı ilə məşğul olan Almaniya Federal Ali Məhkəməsinin ekspert komissiyası oktyabrın 21-də şikayətə münasibətini yenidən bildirmiş və məhkəmənin əvvəlki qərarının qüvvədə saxlandığını elan etmişdir. Məhkəmə mövqeyini belə açıqlamışdır ki, PKK-nın Almaniyadakı özək təşkilatı radikal təməlçi qruplaşma olaraq qalmaqdadır. O, separatist, təməlçi mövqeyindən hələ də əl çəkməmişdir, kürd yaraqlıları və qiyamçı dəstələri ilə əlaqələrini gizli şəkildə davam etdirməkdədir.