Almaniyada təcrübə keçən tələbə: Fəaliyyətimi xaricdə və paralel olaraq Vətənimdə davam etdirmək istəyirəm
Bakı, 14 oktyabr, Aysel Azad, AZƏRTAC
“Əsas prioritetlərimdən biri tibbi təhsilimi davam etdirmək və ixtisaslaşma üzrə dərin biliklər qazanmaqdır. Xüsusən rezidentura təhsilimi Almaniyada almaq istəyirəm. Gələcək fəaliyyətimi həm ölkə xaricində, həm də paralel olaraq öz Vətənimdə davam etdirmək istəyirəm. Beləliklə, qazandığım nəzəri və praktik yenilikləri Azərbaycanda tətbiq etmək imkanım yaranar ki, bu da gələcəkdə tibb sahəsinə yönəlmək istəyən həmvətənlərim üçün böyük kömək olar. Həmçinin ölkəmizdə tibbi xidmətdə rolumun olması məni çox sevindirər”.
Bu fikirləri AZƏRTAC-a müsahibəsində Almaniyadakı Azərbaycanlı Həkimlərin II Forumunun Təşkilat Komitəsinin təsis etdiyi “Heydər Əliyev - 100” təqaüdü proqramının iştirakçısı Nigar Səlimova söyləyib. O, hazırda Azərbaycan Tibb Universitetinin VI kurs tələbəsidir.
Nigar Səlimova Bakıda anadan olub. Paytaxtın Nizami rayonu 220 nömrəli məktəb-liseyində orta təhsilini alan müsahibim müxtəlif olimpiada və müsabiqələrin qalibi olub. “Məktəblilərarası I fənn müsabiqəsində biologiya üzrə I yeri qazanaraq qızıl medala layiq görülmüşəm. Növbəti il fizika üzrə həmin müsabiqədə iştirak edərək II yerin qalibi olmuşam. Biologiya üzrə respublika fənn olimpiadasında III yeri tutdum. Bütün bu nailiyyətlərimə görə məktəbi xüsusi fərqlənmə attestatı ilə bitirərək, Elm və Təhsil Nazirliyi tərəfindən qızıl nişana layiq görülmüşəm.
670 balla dövlət sifarişli əsaslarla Azərbaycan Tibb Universitetinin Müalicə işi fakültəsinə qəbul olmuşam. Universitet təhsili boyunca nəticələrim yüksək olub, əlaçı tələbəyəm”, - deyə o bildirib.
Nigarın tibb üzrə ixtisas seçməsi təsadüfi deyil. Həkim ailəsində anadan olan müsahibimiz deyib ki, valideynləri və yaxınları bu sahəni seçməsi üçün daim ona stimul veriblər. Lakin ona göstərilən dəstəklə yanaşı özü də tibbi uşaq vaxtlarından sevib. Deyir ki, özünü həmişə bu sahədə, ağ xalatda təsəvvür edib. Bu gün də arzularına bir addım daha yaxın olduğu üçün çox sevinir.
O, universitet təhsili müddətində alman dili üzrə də özünü inkişaf etdirib. Almaniyada Yaşayan Azərbaycanlı Həkimlər Forumunu izləyən zaman “Heydər Əliyev - 100” təqaüdü proqramı ilə tanış olub: “Belə bir proqramın olduğunu gördükdən sonra müraciət etdim. Bu təqaüdü qazanmaq mənim üçün çox önəmli bir uğur oldu. İstər məktəb, istər universitet illəri boyunca təhsilimdə əldə etdiyim yüksək nailiyyətlər bu təqaüdü qazanmağıma töhfə verdi. Məncə, hər şeyə sistemli yanaşmaq və öz üzərimdə daim çalışmaq bu uğurun əsas səbəblərindən biri oldu.
İki mərhələdən ibarət olan seçim prosesində əvvəlcə özümü təqdim edim. Növbəti mərhələ isə tibbi biliklərin yoxlanmasından ibarət idi. Məhz bu mərhələdə də müsahibənin rəhbəri Nuran Abdullayev ilə tanış olmaq imkanım yarandı. Müsahibə əsnasında onun da keçdiyi karyera yolu məni bir gənc kimi daha da ruhlandırdı”.
Nigar Səlimova bildirib ki, Almaniyada keçdiyi praktika müddətində həm tibbi, həm də alman dili bacarıqlarını genişləndirmək imkanı qazanıb. Gənc müsahibim bu praktikanın ona həkim-pasiyent münasibətləri, hər bir pasiyentə fərdi yanaşma mövzularında böyük töhfə verdiyini söyləyib.
Təcrübə müddətində ən çox diqqətini çəkən məqam sistemləşdirmə və rəqəmsal texnologiyalardan yüksək istifadə olub: “Belə ki, bütün xəstəlik tarixi bir neçə saniyə içində həkimin gözü önündə olurdu. Bu da daha tez müdaxilə və diaqnoz imkanı verir. Erkən və düzgün diaqnoz müalicənin gedişatını asanlaşdırır. Bu sistemin tətbiqi nəinki radiologiya, həmçinin digər sahələrdə istər həkimlər, istərsə də pasiyentlər üçün çox faydalı və əhəmiyyətlidir. Eyni zamanda, praktika zamanı interdisiplinar toplantılarda iştirakım artıq müəyyən xəstəliklər barədə məndə fərqli baxış yaratdı”.
Təhsilini Almaniyada davam etdirmək istəyən Nigar hesab edir ki, orada tibbi təhsilin yüksək səviyyədə olması, tibbi texnologiyaların geniş istifadəsi və beynəlxalq səviyyədə tanınan mütəxəssislərlə birgə işləmək imkanları ona daha müasir tibbi yanaşmaları öyrənmək fürsəti verəcək: “Eyni zamanda, Almaniyada rezidentura təhsili almaq, mənə tibb sahəsində daha çox təcrübə toplamağa və gələcəkdə öz sahəmdə qabaqcıl mütəxəssis olmağa imkan yaradar. Lakin fəaliyyətimi ölkə xarici ilə yanaşı, Azərbaycanda da davam etdirməyi planlayıram”.
Bölmənin digər xəbərləri
