AMD ŞİRKƏTİ MƏHSULLARININ TƏQDİMAT MƏRASİMİ KEÇİRİLMİŞDİR
Tədbirdə şirkətin Rusiya-MDB, Şərqi Avropa ölkələrində və Türkiyədə satış və marketinq üzrə vitse-prezidenti Pyer Bransvik əsası 1969-cu ildə qoyulmuş qurumun tarixi və fəaliyyətinin mühüm istiqamətləri haqqında qısa məlumat vermişdir. Bildirilmişdir ki, kompyuter, rabitə vasitələri və məişət elektron qurğuları üçün innovasiya mikroprosessorları istehsalında qabaqcıl olan şirkətin 2005-ci ildə gəliri 96 milyon ABŞ dolları təşkil etmişdir və onun əsas məqsədi müştərilərin tələbatını maksimum ödəməkdir. Hazırda dünyada istehsal olunan kompyuterlərin çoxunun bu şirkətin məhsulları əsasında hazırlandığını söyləyən P.Bransvik AMD-nin DiVi şirkətini Cənubi Qafqaz regionu üzrə rəsmi distribyuter təyin etmək niyyətində olduğunu açıqlamışdır.
DiVi şirkətinin baş meneceri Emin Quliyev göstərilən etimada görə təşəkkür etmiş və AMD-nin mövqeyinin regionda, eləcə də respublikamızın ərazisində möhkəmlənəcəyinə ümidvar olduğunu bildirmişdir. O, AMD şirkətinin bu gün mikroprosessor və digər mikroelektronika istehsalı sahəsində texnoloji lider olduğunu, onun qabaqcıl texnologiyasının Azərbaycanda yerli kompyuter sənayesinin inkişafına müsbət təsir göstərəcəyini diqqətə çatdırmışdır.
Mərasimdə şirkətin məhsullarının digər şirkətlərin oxşar məhsulları ilə müqayisədə üstünlüklərinin nümayiş etdirildiyi film göstərilmiş, iştirakçıların sualları cavablandırılmışdır.
Bölmənin digər xəbərləri
